Shillong, Naiwieng 08
Lada ka Sorkar Kmie bad Sorkar Jylla ki lap ïa ki sabut bad ki sakhi satar ba ka don ka jingbamsap ha kaba shna surok da ka Dhar Construction Company, yn hap ban leh da kaba tyngeh, la ong u Bah A.L Hek uba dei u Myntri ka Sorkar Jylla.
U Bah Hek uba dei ruh u nongïalam ka BJP ha Meghalaya u la ong ba lada lap ïa ki sabut ba ka don ka jingbamsap, ka Sorkar Kmie bad ka Sorkar Jylla kan hap ban leh da kaba tyngeh pyrshah ïa ka Dhar Construction naba kumba ka long mynta, ka la don ka jingkynnoh shna torti ïa ka surok NH-206.
Lah ban pynkynmaw ba dang shen na ka liang jong ka Joint Action Committee jong ka War Jaiñtia ka la byrngem ban leit ujor sha ïingbishar pyrshah ïa ka Dhar Construction Company, kata hadien ba ka jingshna ïa ka National Highway (NH-206) ha ka jinglut jingsep kaba kot shaduh T.43 klur tam, tang hadien 2 bnai kane ka surok ka la jot rathai noh. Ka surok NH-206 ka dei kaba sdang na Jowai marjan ka surok NH-106 bad ka ïaid lyngba sha Dawki bad kut pat ha Mylliem. Ka dei ruh shi bynta jong ka surok Shillong-Sylhet.
“Lada lah ban pynshisha lyngba ki sabut kiba biang ïa ka jingdonkti ha ki kam bamsap, ka sorkar kmie bad ka sorkar jylla ka dei ban leh da kaba tyngeh pyrshah ïa katei ka kompeni,” la ong u Bah Hek.
Shuh shuh haba kylli ba hato ka lah ban poi haduh u pud ban buh dak sniew ne ‘Blacklist’ ïa katei ka kompeni, u Bah Hek u la ong ba lada lah ban pynshisha ba ki donkti ha ka kam bamsap kumta kan sa wan hi.
Haba kylli hato dang donkam ïa ki sabut haba kane ka kam ka la paw hapoh ka RTI, u Bah Hek u la ong, “Ngam pat ïohi ïa kata ka kaiphod jong ka RTI, pyni shwa ïa nga, nangta ngan sa ngeit ïa phi.”
Ha kajuh ka por u Bah Hek u la ong ruh ba ym lah ban pdiang ïa kum katei ka rukom treikam jong kompeni bad ka sorkar kan sa shim ïa la ka rai.
