Shillong, Naiwieng 08
Haduh lai ngut ki runar ki la shah kem noh ha ki pulit Special Cell jong ka East Khasi Hills hadien ba ki la donkti ban rahbor ïa ki nongñiah trok tang da kaba pynbiej ban thied jhur ha ka dor kaba tad.
Ha ka kyrwoh khubor na u Superintendent of Police (City), East Khasi Hills, Bah Vivek Syiem, u la ïathuh ba ïa kitei lai ngut la ïoh kem ha ka 6 tarik mynta u bnai na Mawlai By-pass lyngba ka jingïarap lang da ki dkhot ka Meghalaya Traders Fresh Vegetable & Ginger Association lem bad ka Khasi Jaiñtia Fresh Vegetable Suppliers Association.
La ong ba na ka liang jong ki pulit ki la ïoh jingtip ba ka la don kawei ka kynhun ki runar kaba ju treikam da kaba rahbor ïa ki nongñiah kali kit jhur, kata tang da kaba pynbiej ïa ki nongñiah kali kit jhur ba kin pynkohnguh ïa ki trai kali ba kin thied ïa ki jhur ha ka dor kaba tad bha. Hadien kane, ki ju ïalam pat ïa ki nongñiah kali shajan ka ISBT lane Umïam ban kit ïa ki jhur.
U Bah Vivek Syiem u la ong, hadien ba ki la ïalam bad poi ha kitei ki jaka, kine ki runar ki ju rahbor pynban ïa ki nongñiah kali sha ki jaka khlaw ba kynjah bad pynbor ïa ki ba kin pyntip pat sha ki trai kali ba ki la pynkit ïa ki jhur hapoh ka kali bad ban phah noh ïa ka pisa lyngba ka ‘Google Pay’ sha ki nongdie jhur, kiba dei hi ma ki, ki nongrahbor.
“Kumta hadien ba ngi la ïoh jingtip halor kane bad lyngba ka jingïarap ka MTFVGA bad ka KJFVSA, ki pulit ka Special Cell ki la pynlong ïa ka jingkhynra ha ka Lah Sngi U Blei kaba dei ka 6 tarik ha kaba la ïoh ban bat ïa lai ngut ki runar na Mawlai By-pass hadien ba ki la rahbor ïa uwei u nongñiah trok na Lad Smit,” la ong u Bah Vivek bad bynrap ba ha kane ka jingrahbor, kine ki runar ki la pynbor ïa une u nongñiah trok ba un phone ïa u trai kali bad ban phah siew noh ïa ka bai jhur.
Shuh shuh na ka liang u SP (City) u la ong ba kane kam dei ka sien kaba nyngkong hynrei kane ka kynhun runar ka la leh ïa kane ka jait mynta la bunsien. Kumta na ka bynta ban ujor ïa ka ejahar la kyntu ruh ïa kito kiba la ngat ha kane ka apot ba kin wan mih shakhmat.
Hadien ka jingïoh kem ïa kine ki lai ngut, ki pulit ka tnat Special Cell mynta ki dang pynlong ka jingthwet ban lap dien sa ïa kiwei pat kiba donkti ha kane ka kam.
Na kine lai ngut kiba la shah kem, ki pulit ki la ïoh ban kurup haduh saw tylli ki mobile phone bad kawei ka kali Maruti Swift Dzire kaba don ïa u nombor ML05-J-3466.
Ïa kine runar la pynrung case hapoh ka thanat Madanrting katkum ka Case No. 111(11)2023 bad la pynngat ïa ki hapoh ka kyndon 419/420/511/364A/384/340/34 IPC.
