Shillong, Naiwieng 08
Tang hadien shisngi jong ka jingsaphriang kawei ka dur-khih ne video ba pyni ïa ka jingdie drok harud surok khlem jingtieng, ki pulit ki la ïoh ban kem noh ïa kawei ka briew kaba donkti ban khaïi drok na Them Metor.
Lah ban pynkynmaw ba ha ka Sngi Ba-ar ka la don ka jingsaphriang jong kawei ka dur-khih ha kaba la ïoh ban sakhi ba ki la don ki samla shynrang kiba la ïalum ïa ki kynthei ha lynti ïaid kjat hajan ka surok GS Road pyrshah ïa ka Bhutia Market kaba don marjan bad ka Bimola ha kaba la ïohi ïa ka jingai buhrieh ïa ki song kiba rit.
Ha ka kyrwoh khubor ba la pyllait da u Superintendent of Police (City), East Khasi Hills, Bah Vivek Syiem, u la ong hadien ka jingïoh jingtip na ki tyllong khubor, ki pulit ka Anti Narcotic Task Force ki la pynlong ka jingkhynra ha Them Metor ha kaba la ïoh kem ïa kawei ka briew kaba dang 26 snem ka rta.
Ha ka jingkhynra ïa ka ïingsah jong kane ka briew, ki pulit ka ANTF ki la ïoh ban kurup haduh 92 tylli ki bilor plastik barit ba la thep ïa u heroin ba khia 99.21 gram, 51 tylli ki bilor plastik rit thylli, 13 tylli ki synduk sabon ba pyndonkam ban song heroin, kawei ka mobile phone bad kawei ka Aadhar Card.
Ha kajuh ka por na ka liang jong u Superintendent of Police (City) Bah Vivek Syiem, u la pyntip ruh ba ka jingthwet ïa kiwei pat ki briew kiba donkti ha kane ka kam khaïi drok ka dang ïaid shakhmat. Ha kaba ïadei bad kane, ïa katei ka briew ba la kem la pynrung case ha thanat Sadar hapoh ka kyndon NDPS Act.
