Shillong, Naiwieng 08
U Shongknor ka JAC-NEHU, Prof. Lakhon Kma u la ban biang ba ïa u Technical Officer/Senior Consultant, u Rohit Prasad la thung kam ha ka rukom kaba be-aiñ bad kum ka komiti kam kwah ban tip eiei halor ka jingpyndep jingpule jong u hynrei ka dawa beit ban weng kam noh shi syndon ïa u.
“Phim shym la thung da kaba bud ïa ki kyndon bad kane hi ka la long lypa ka daw kaba biang eh ïa phi ban weng ïa u briew bad yn ym don kano-kano ka jingpynshai na ka liang u Vice-Chancellor (VC), Prof. Prabha Shankar Shukla ba u donkam ïa ka daw ban weng kam ïa u,” la ong u Prof. Kma haba kren sha ki lad pathai khubor ha ka Sngi Balang.
Katkum ka jingïathuh jong u, ka JAC ka la buh jingkylli halor ka jingthung kam ïa u Prasad bad kam kwah satia da kiwei pat ki daw na u VC ban weng ïa u Prasad.
U Prof. Kma u la pynkynmaw ruh ba ha ka jingïakynduh ba dang shen jong u VC bad ki lad pathai khubor, u la ong ba u Prasad um dei na ka jait jong u.
“Balei kane ka kyntien ka mih na shyntur jong u? La pynbor ïa ngi ban ngeit ba une u briew u dei uba peit kyrdan ha ka liang ka jait ka khong bad kane ka dei kaei kaba u pyrshang ban wanrah ha NEHU,” la ong u Shongknor.
U la ong ruh ba lada u Prof. Shukla u leh mynleh kumba kyllut bad matlah, ka komiti kan thoh sha ka President ka ri kumjuh sha u Lat ka Jylla halor ki jingpynkheiñ kyndon jong u.
Haba kylli la ka komiti kan tied ne em ïa ka jingkhang jong ka ïingbishar lada u VC u ïai kuman, u Prof. Kma u la ong ba ki dkhot kin sa shong jingïalang ban rai halor ka sienjam ban shim nangne shakhmat.
“Ngin ym kyntait ban leit sha ïingbishar lada donkam namar ka JAC ka la dep rai ba ïa ka tulop ba la siew sha u Prasad, u VC un hap ban siew na ka tulop jong u, ym na ka pla tyngka ka NEHU,” u la bynrap.
Ka JAC haba pynsngew ïa ki jingkynnoh pyrshah ïa u VC halor ka jingthung kam ïa u Prasad, ka la kdew ba kam shym la don kano-kano ka jingpynbna haba ïadei bad katei ka kam.
U Prof. Kma u la ïathuh ruh halor ka jingbym don ka ‘Selection Committee’ bad ïa ka ‘Interview’ la kynnoh ba la pynlong hi da u VC lyngba ka ‘online’, ha kawei ka liang kaba wanrah ka jingsngewkhia halor ka jingshah liang bad jingkhuid jong ka rukom jied.
U la ban biang ba katei ka rukom thung kam ka la pynkheiñ ïa ki kyndon kiba la wanrah ha ka jingïalang ba 185 jong ka Executive Council, ka kyndon kaba la kynnoh ba u VC da lade u la kyntait.
Ka tulop jong u Prasad ka kynthup ruh ïa ka Dearness Allowance (DA) kaba 38% kaba katkum ka jingsngewthuh u Prof. Kma, kam ïahap satia na bynta ki nongtrei kontrak. U la kam ruh ba kaba kum katei ka jingsiew khlem ka jingmynjur jong ka UGC ka long ka jingpynkheiñ ïa ki kyndon.
Shuh shuh ki la don ki jingartatien kiba la mih halor ka jingshisha jong ka jingpule kaba u Prasad u la pyndep – kaba kynthup ïa ka Diploma ha ka IT (2010), BE IT (2013), MBA ha ka tnad pule Human Resources (2016), MBA IT (2016), bad M.Phil ha ka Commerce (2017).
Na ka liang u Shongknor u la ban jur ba ka jingbym biang ha ka jingkhuid haba ïadei bad ki kot ki sla donkam, kumjuh ka jingbym don jong ka jingpynbna, ka la nang pynsuba sniew shuh-shuh haba phai sha katei ka rukom thung kam.
