Shillong, Naiwieng 08
U Bah Alexander Laloo Hek uba dei u nongïalam ka Bharatiya Janata Party (BJP) u la ïathuh ba nalor ka kyrteng jong u, mynta la mih paw sa ar tylli ki kyrteng kiba kwah ban ïakhun bad aireng ha ka ilekshon MP sha ïingdorbar Lok Sabha ka ban long ha u snem ban wan na ka Shillong Parliamentary Constituency.
Kumba ka long mynta, wat la ki la don haduh 3 ngut kiba pan tiket na ka BJP ban ïakhun ïa ka ilekshon, hynrei dei tang ka kyrteng u Bah A.L Hek kaba la paw katba ym pat don jingtip pat halor ki ar ngut kiwei pat kiba la pan tiket.
Haba kren sha ki lad pathai khubor ha ka Sngi Balang, u Bah A.L Hek uba dei ruh u Myntri ka Sorkar Jylla u la ong, “Wat la paw kyrteng sa ar ngut nalor ka kyrteng ka jong nga, hynrei haduh mynta ngam pat tip ïa ka kyrteng jong kita ki ar ngut kiwei pat kiba la pan tiket.”
“Kumba ka long mynta, nga ieh beit ha ka rai jong ki nongïalam ba ha khmat, ba kin peit bad bishar ïano kin sei napdeng ki 3 ngut kiba la pan tiket ha kane ka ilekshon MP,” la ong u Bah Hek bad bynrap “Nga kubur ba ka kyrteng ka jong nga ruh ka dei kawei napdeng ki 3 ngut hynrei uno-uno uba ïoh ïa ka tiket un hap ban ïatrei shitom lang ban pyntikna ba ka jingjop kan leit sha ka BJP”.
Haba kylli ba u don aïu ban pynpaw ha kaba ïadei bad ka seng BJP kaba la shah kynnoh ba ka dei ka seng kaba ïuhroit ïa ki Khristan, u Bah A.L Hek u la ong, “Nga la don ha ka seng BJP naduh u snem 1996 bad naduh kitei ki por ki paidbah ki la kynnoh ba ka BJP ka dei kaba pyrshah ïa ki Khristan hynrei baroh ki seng saiñ pyrthei ki don beit ïa kano-kano ka kam ba ki leh kaba pyrshah ïa kiwei. Kumta kam long kaba shong hok satia ban shu kynnoh beit tang ïa kawei ka seng saiñ pyrthei.”
Ha kawei pat ka liang haba kylli halor ki nongkitkam bathymmai ka Executive Committee ka BJP ha Meghalaya, u Bah A.L Hek u la ong, hadien ba u Rikman Momin u la shimti ïa ka kam President ka BJP ha Meghalaya, mynta u la leit rah sha Delhi ïa ka thup kyrteng jong ki nongkitkam ka EC ka BJP ha Meghalaya na ka bynta ban ïoh ka jingmynjur bad shen yn sa lah ban pynbna ïa kine ki kyrteng.
“Nga la ïoh ban ïakren bad u President ka BJP Meghalaya uba la hiar sha Delhi na ka bynta ban leit rah ïa ka thup kyrteng jong ki nongkitkam bathymmai hakhmat ki nongïalam ka sengkmie ka BJP ban ïoh ka jingmynjur,” la ong u Bah Hek.
