Shillong, Naiwieng 08
Kam pat shai haduh mynta mano napdeng ki kompani kiba ïashimbynta ha ka ‘tender’ kin ïoh pynïaid ïa ki 108 Ambulance ban ai jingshakri ïa ki paidbah ka Jylla ha ki kam ba donkam kyrkieh eh khamtam ka pang ka shitom.
Katkum ka jingpynbna ïar kaba la pynmih ha ka Sngi Balang da u Mission Director ka National Health Mission (NHM), u Ramkumar S, la ong ba ka long kaba donkam ban jied ïa ka kompani kaba biang tam bad ka don ka jinglah ban ai ki jingshakri kiba donkam tam eh.
U la ong ba ka jingpynïaid ïa ka ‘tender’ kam pat kut satia, bad haduh mynta ym pat jied ïano-ïano.
La ong ba ka bynta kaba dei ha ka liang ka pisa tyngka kaba ki kompani ki buh, ym pat plied haduh mynta bad ki don katto katne ki jingtip kiba la poi sha ka tnat ka koit ka khiah kiba donkam ban da khmih bniah bha.
Kumta u la ong ba yn don shuh shuh ka jingai jingtip hadien ba la dep ka jingkhmih bniah ïa ki jingdonkam.
Lah ban kdew hangne ba ka kynrum-kynram ka la mih ha NHM ha kaba ki don ki kompani kiba khlem pat biang ha ka rukom ai jingshakri kiba wan ïashimbynta ha ka tender, bad don ruh ka bynta ba ka NHM ka ai syrnot wat ïa ka kompani kaba khlem pat biang ka jingshemphang bad jinglah ha ka rukom ai jingshakri lyngba ki ambulance.
