Shillong, Naiwieng 09
U Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem ha ka Sngi Palei u la ïoh ban buh bad plie ïa u mawnongrim na ka bynta ban tei ïa ka “Resource Recovery Centre” ne ka jaka lum thup bad saiñ ïa u ñiut ha Mawlai Mawroh.
Kane ka Resource Recovery Centre kan dei kaba nyngkong na ka KHADC hapoh ka skhim Solid Waste Management Cell. Ïa kane ka centre yn tei ha ka jaka ba la ai sngewbha da ka shnong Mawroh ha ka jinglut ba la mang kaba long T.56 lak. Ïa kane ka skhim ka council ka la mang lyngba ka Tied Grant na ka 15th Finance Commission.
Ha kane ka sngi buh mawnongrim la ïadonlang u MDC ka Mawlai Bah Teibor Pathaw, u MDC ka Jirang Bah Victor Ranee, ki ophisar ka KHADC, u Bah W Kharkrang na ka Pollution Control Board, ki nongïalam shnong ka Mawlai Mawroh bad kiwei kiwei.
U Bah Pynïaid haba kren ha kane ka sngi, u la ong ba kane ka projek kan long ka jingkyrkhu ïa ka shnong bad ka nuksa ïa kiwei ha kaba ka district council ka la wanrah na bynta ka jingmyntoi ki nongshong shnong. U la ai khublei ïa ka shnong kaba la ai sngewbha ïa ka jaka.
U Bah Pynïaid u la ong ba tang hapoh ka Hima Mylliem ki don haduh 1464 tylli ki dorbar shnong bad haba shim ïa baroh ki shnong hapoh ki 54 tylli ki hima kiba hap hapoh ka jingpeit jong ka KHADC ki don palat ïa ka 3000 tylli. Kane ka jaka bret ñiut kan long kaba nyngkong bad ka Mawroh kan long kaba nyngkong napdeng ki 3000 tylli ki shnong.
U CEM u la ong, ka jingïakren mynta hapdeng ki paidbah ka long beit halor ka jingkhuid jingsuba bad ka umbam umdih kaba khuid namar lyngba kine yn lah ban ïoh ka jingkoit jingkhiah. Hynrei lada ym lah ban leh eiei ïa ka ñiut bad jaboh ba mih na ki ïing briew bad ban shu leit bret kumto kan sa wanrah ka jingjaboh pat ïa ka um ka ban sa ktah ïa ka koit ka khiah.
Shuh shuh u la ïathuh ba ka la don ka jingïakren hapdeng ka KHADC bad ka sorkar ban wanrah ïa ka khuid ka suba bad na ka bynta kane donkam ïa ka jingïatreilang jong ki dorbar shnong namar ki dorbar shnong ki dei ki thymmei ha ki shnong ki thaw.
U la ong, ka KHADC kan long tang ka nongpynsdang bad ban ai jinghikai, haba ka shnong kala lah ban pynïaid ïa ka kam baroh, ka shnong kan sa pynïaid bad kaba kongsan ka long ba kine ki RRC kin long ki lad ai kam ïa ki briew jong ka shnong da ka jingïatreilang.
Katba u Bah Teiborlang u la pynpaw ba ka thong jong u ka long ban pynlong ïa ka Mawlai kaba khuid ba suba. U la ong ba kane ka recovery resource centre kan long ka jingkyrkhu ïa ka shnong bad kyntu ïa ka shnong ba kan peit bad pynïaid ha ka rukom kaba biang tam.
