Shillong, Naiwieng 09
Ka NEHUTA, NEHUNSA bad ka NEHUSU hapoh ka shatri jong ka Joint Action Committee (JAC) hadien ba ka la ïohi ïa ka jingleh mynthi bad sngap jar jong u Vice Chancellor (VC) ka skulbah North East Hill University (NEHU) ïa ki mat dawa jong ki, kumta ka la rai ban pynjur noh ïa ka jingïakhih.
Ïa kane ka rai ban pynjur ïa ka jingïakhih la shim ha ka Sngi Palei ha ka jingïalang jong ka JAC. Kane ka jingïakhih ha kane ka kynti ba mynta kan long da ka jingsangeh treikam kaba khlem buh por ka ban sdang naduh ka 13 tarik mynta u bnai, kum ka dak ban pyrshah ïa ka jingleh mynthi u VC ïa ki 9 tylli ki mat jingdawa.
Ki khyndai tylli ki mat jingdawa kiba la buh hakhmat u VC ki kynthup ïa ka jingweng noh mardor ïa u Technical Officer/Senior Consultant ba la kynnoh thung be-aiñ, ka jingthung ïa u Statutory Officer and University Engineer, ka jingjot rathai ka Health Centre, ban pyllait ïa ki nonghikai bad Technical Staff na ki kam ophis, ban thep lang ïa ka NEHU Act, Statutes bad Ordinance ha ka Official Website ka NEHU, ban pynlong man u snem ïa ka Convocation, marking system, ban kynthup lang ïa ki dkhot ka NEHUSU kum ki nongmihkhmat ha ka Academic Council bad ban shong bishar biang ïa ka Educationally Backward Area Quota na ki Block sha ki shnong.
Ka JAC ka la pyntip ba ki jingshakri ba kongsan kata kum ka jingpynïaid ïa ki bos, ka jingsam um, ka bording, ka health centre, ki tnat kiba ïadei bad ki kam thungkam bad pension cell kin lait na kane ka jingsangeh treikam.
