Shillong, Naiwieng 09
Ki samla pule bapher-bapher kiba don hapoh ka shatri jong ka North East Student Organization (NESO) hapoh ka jingïalam u Bah Samuel Jyrwa kum Chairman ki la pynlong ka jingshong kyllaiñ mungor hakhmat motdur jong u Tirot Sing kaba don ha madan Ïewrynghep (Fire Brigade) Laitumkhrah kum ka dak ban pynrem jur ïa ka sorkar pdeng halor ka jingsngap jar ha kaba ïadei bad ka jingïaumsnam ha ka jylla Manipur.
Ha kane ka jingshong kyllaiñ mungor jong ki samla pule la synranlang da ki sengbhalang jong ka jylla kiba kynthup ïa ka Hynñiewtrep Integrated Territorial Organization (HITO), ka Khasi Students’ Union (KSU), ka Hynñiewtrep National Youth Front (HNYF), ka Federation Khasi Jaiñtia & Garo People (FKJGP), bad kiwei kiwei.
Kane ka jingshong kyllaiñ mungor jong ki samla mynta ka sngi (Sngi Palei) ka dei namar ka jingsngap mynthi jong ka Sorkar India bad ka jingbym leh eiei ban pynïoh noh ïa ka jingïasuk hapoh ka jylla Manipur.
Haba ai jingkren ha kane ka jingïalang, u Bah Lambokstarwell Marngar uba dei u President ka KSU u la ong ba ka jingsngap jar ka Sorkar India hapoh ka jingïalam u Narendra Modi ïa ka jingïaumsnam ha Manipur ka long kumba ka ai mynsiem.
U la ong ba ka jingïaumsnam ka la neh mynta la hynriew bnai kynthih hynrei ka Sorkar India kam shym la wanrah ïa ka jingshongsuk ha kane ka jylla.
“Kane ka jingleh mynthi ka Sorkar India ka pyni ba ki kheiñ ba kiba shong ha thaiñ Shatei Lam Mihngi kim dei ki nong India” u la ong.
U la ong ba kane ka dang jia ha Manipur kan sa jia ruh ha kiwei ki jylla kynthup ïa ka Meghalaya bad ka Sorkar India kan nym patiaw kumba ka leh bym suitñiew ïa ka jylla Manipur.
Kiwei pat ki nongïalam sengbhalang bapher-bapher, ki la ong ba balei ka sorkar pdeng ka sngap jar-jar ïa kane ka kam ban leh eiei noh na ka bynta ka jylla Manipur kaba la dap hynriew bnai jong ka jingïaumsnam kin sa shim da kawei pat ka rai.
Ïa kum kane ka jingïakhih ka NESO la pynlong ha kylleng ki jylla jong ka thaiñ Shatei Lam Mihngi ban pynbor ïa ka Sorkar India ba kan wanrah noh ïa ka jingsuk ha Manipur hapdeng ka jingkynad ki jaidbynriew Meitei bad Kuki.
