Shillong, Naiwieng 09
Na ka jingbym don khynnah skul shuh ha ki khyndiat snem kiba la leit, mynta la don biang ki khynnah kiba wan ban pule ban ïoh jingnang jingstad.
Kane ka dei ka Government Lower Primary School ha shnong Thynroit kaba hap ha Mawkynrew konstitwensi kaba la lah ban khie im biang bad kup da ka dur kaba iphuh-iphieng hadien katto-katne snem ba ym don khynnah shuh kiba pule.
La ïathuh ba ka Government Lower Primary School, Thynroit ka la ai ka jingshakri la bun phew snem bad ka la don naduh u snem 1947.
Hynrei hashwa jong u snem 2018, kane ka skul ka la kynjah namar ym don khynnah shuh kiba wan pule. Hynrei lyngba ka jingïatreilang jong ka Dorbar Shnong Thynroit, ka School Managing Committee, ki nonghikai lem ki kmie ki kpa jong ki khynnah skul nalor u MLA ka Mawkynrew, u Bah Banteidor Lyngdoh, la lah ban pynwandur thymmai biang ïa kane ka jaka pule ki hep barit hapoh ka shnong.
U Bah Banteidor Lyngdoh kum u Myntri Sorkar bad MLA ha ki snem ba la leit, u la lah ban pynïoh na ka Sorkar Jylla ïa ka jingmang pisa kumba T.37 lak na ka bynta ban shna biang ïa ka ïing skul kaba thymmai ha u snem 2019-2020. Kumta ynda la dep ban shna, la plie biang ïa ka ïing skul kaba thymmai ha u snem 2022.
U Bah Harkin Warjri, uba dei Sordar ka shnong Thynroit, bad ha kajuh ka por u Chairman ka School Managing Committee u la batai ïa ka jingïaid lynti kane ka skul hashwa u snem 2018 bad hadien ba la ïoh ïa ka ïing skul kaba thymmai.
La ïathuh ba hashwa ban pynlong skul biang hadien ba la wan thymmai ki nonghikai, la hap ban shu kyntu ba kawei kawei ka longïing kan phah uwei ne kawei ka khun ban wan skul ha kane ka skul.
“Ka don ka por kaba ngi hap ban synñiang pisa ban pynbha ïa ka skul ha ka por ba ngim pat ïoh ïa ka ïing skul kaba paka na u MLA,”
Mynta kane ka skul ka la don palat 100 ngut ki khynnah skul naduh ki khynnah rit haduh ka Class V.
U Bah Harkin u la ong ba ka dei ka jingïatreilang ba ka skul ka la ïoh pat ka dur kaba kum ka skul bad lada ym dei ka jingïatreilang ka lah ban shu jah rngai ne shah pynduh noh ha ki bor Sorkar.
Kumta ha ka Sngi Palei, kane ka skul ka la pynlong ïa ka prokram ban rakhe ïa ka sngi burom jong ki kmie ki kpa ha kaba ki khynnah skul, ki nonghikai bad ki kmie ki kpa ki la leh kmen leh sngewbha da kaba ai ki jingshad jingrwai nalor ka jingpyni riam na ki hep barit.
Ha kane ka sngi la donlang ka Dr Amanda A Pakynteiñ, ka kurim u Bah Banteidor Lyngdoh, MLA ka Mawkynrew kaba dei ruh kawei na ki nonghikai skul nalor u BDO ka Mawkynrew C&RD Block, Bah G Dhar, ki riewrangbah ka thaiñ bad kiwei kiwei.
Ka Dr Amanda haba ai jingkren ka la ong ba kum ka nonghikai, ka ïohi ha nongbah Shillong ïa ki jingsniew ha kaba ki khynnah ki shah pynngop bad ka la kyntu ïa ki khynnah skul ban kiar na ki jingsniew bad kynmaw ïa ka jingtrei shitom ki kmie ki kpa ban pynïoh ha ki ïa ka jingnang jingstad.
