Shillong, Naiwieng 09
U Chief Executive Member jong ka KHADC u Bah Pynïaid Sing Syiem u la ong ba ka jingpule kaba biang kam dei eh ba wan tang na ki skul ba paw hynrei na kino -kino ki skul ruh lah tang lada ki khynnah ki trei shitom bad minot.
U Bah Pynïaid u la kren ïa kane ha ka jingïalang ba la pynlong ha Mawroh hadien ba u la dep ban jurip ïa ka skul Mawroh Secondary School kaba don ha Mawlai Mawroh ha ka Sngi Palei.
“Kampher lada phi don ha kino-kino ki skul, la ki dei kiba paw ne kiba kumno-kumno ruh, hynrei kaba donkam ka long ba kum ki khynnah ki dei ban long kiba trei shitom bad minot bad ka jingkohnguh ïa ki nonghikai bad ki kmie ki kpa,” la ong u Bah Pynïaid.
Ha kaba ïadei bad ka skul, kata hadien ba u la dep ban wan jurip bad ïoh ruh ka dorkhas na ka skul, u CEM u la ong, na ka liang jong ka Council kan nym kular katno kan ai hynrei kan sa ai pat ïa ka jingïarap ïa kane ka skul katba ki lah la ka bor.
U Bah Pynïaid u la ong, haba la ïohsngew ïa ka jingkren kiba la kren ha khmat khamtam na ka Principal kane ka skul ka Kong H Dkhar ba ki bor shnong ha u snem 1971 ki la sdang ïa ka skul step ha kaba mynta la shimti da ka sorkar, ka skul Upper Primary la ïoh ïa ka jingïarap na ka sorkar.
Hynrei haba phai sha ka Mawroh Secondary School la pynshai ba ïa kane ka skul la kyrshan da ka bor shnong bad naduh u snem 2012 ki samla pule ki la ïoh ban thoh ïa ka eksmin matrik, kaba phylla ka long ba ïa ka bai skul pat la shim tang T.100 shibnai bad ïa ka jingsiew ïa ki nonghikai la siew da ka shnong.
U Bah Pynïaid u la ong ba kum ki nongmihkhmat ba wan na nongkyndong ki sngewthuh ïa kane ka jingeh namar bun sha ki nongkyndong ki don tang ïa ka LP bad UP skul bad ban pule kham shajrong kim ïoh lad ba ban ka jingduna ha ka ïoh ka kot.
U CEM u la ong ba shnong Mawroh ka la leh ïa kaba bha tam ba ki samla kin ïoh ban pule kiba dei na ka shnong bad ki shnong ba marjan, dei halor kane na ka liang jong ka District Council kan ïarap ïa kane ka skul katba ka lah na ka bor jong ki.
Ha kane ka sngi jong ka jingleit jurip ïa katei ka skul, ïa u CEM la synran lang da u MDC ka Mawlai Bah Teibor Pathaw, MDC ka Jirang Bah Victor Ranee, ki ophisar ka KHADC ryngkat ki nongïalam shnong ka Mawroh, ki bor pynïaid skul bad ki nonghikai.
