Nongstoiñ, Naiwieng 09
Ban pynsngewthuh paidbah halor ka jingdonkam jong ka koit ka khiah ki khynnah naduh ba dang pun, kumjuh ruh ban ïada ïa ka jingkhlad bad jingshitom jong ki longkmie kiba armet ha ka por ba kha khyllung, kum shi bynta ban pyntyllun ïa ka Mission jong ka Sorkar Meghalaya kaba la tip kum Early Child Development and Rescue Mission, ka ophis u Deputy Commissioners ka West Khasi Hills District ka la pynlong ïa ka prokram ha Don Bosco Hall, Banglapluh, Mawshynrut Civil Sub Division.
Ha katei ka sngi u Deputy Commissioner jong ka West Khasi Hills District Bah Garod LSN Dykes, (IAS), u la long kum u kongsan ha ka jingdon ryngkat lang u Bah R Kharkongor, Block Development Officer, Mawshynrut C&RD Block, Kong E Tariang Pajat, DMHO, Kong OC Nongbri DPO ICDS, Kong N Warjri, Programme Manager, MECDM, kiwei ki ophisar bad ki nongtrei sorkar na ki tnat sorkar kiba pher ha ka jingdon lang jong ki Rangbah Shnong, ki nongtrei Asha, Anganwadi, bad ki paidbah nongshong shnong kiba hap hapoh jong ka Mawshynrut Block, kaba la pynlong ïa kane ka prokram kaba jop bad kaba seisoh.
U Deputy Commissioner ka West Khasi Hills u Bah Garod LSN Dykes, u la ai jingmut bad kyntu ïa baroh ban kiar na ka shongkha khynnah, namar baroh ngi kwah ba ki khun ki kti ki jong ngi kin koit kin khiah, kin san kin roi ha ka met ka phad bad ban stad ha ka pule ka puthi jong ki. Ka shongkha khynnah ym tang ba ka ktah ïa ka koit ka khiah jong ka kmie, hynrei ka ktah lang ïa i khyllung ruh kumjuh.
Ha kajuh ka por u la kyntu ïa baroh ki longkmie kiba armet ba ki dei ban leit sumar tista ha ki jaka ai jingsumar ha ka por ba ki armet bad ba kin leit kha ha ki jaka sumar ban lait na kino-kino ki jingjia kiba sngewsih.
Ha kane ka sngi la ïoh ruh ïa ki jingkren bad jingpynshai na ki riewshemphang jong ki tnat sorkar bapher bapher ba kynthup ïa ka Kong OC Nongbri na ka tnat Social Welfare, kaba la ai jingkren bad pynshai halor ki jingbam teimet na ka bynta ki khynnah jong ka Mawshynrut Block.
Na ka tnat ka Koit ka Khiah ka Kong E Tariang Pajat kaba la ai jingkren bad batai halor ki lad ban ïada ïa ka jingkhlad jong ki longkmie ha ka por ba kha khyllung bad ka la kyntu ban wan kha ha ki jaka sumar khnang ban lait na jingjia kiba sngewsih, kumjuh ruh ki ophisar na ka tnat Pule puthi kiba la pynshai paidbah halor ka New India Literacy Programme (NILP) bad Inclusive Education (IE) na ka bynta ki skul kiba hap hapoh jong ka Mawshynrut Block.
Kiwei pat ki prokram ha kane ka sngi ki kynthup ïa ka ECD Ice-Breaking Session, Brain Wiring Game, Reflection & Discussion on Brain Development Game, ECD Way Forward, Focus Group Discussion bad kiwei kiwei, kiba la batai bad pynshai paidbah na ki dkhot jong ka Meghalaya Early Child Development Mission (MECDM).
