Shillong, Naiwieng 09
Ki pulit ka Eastern Range jong ka jylla ha ka Sngi Palei ki la thang noh ha ka ding kaba klang jong ka karkhana shna dewbilat kaba don ha East Jaiñtia Hills ïa ki drok ba bun jait ba la kurup na ka por sha ka por bad kiba shongdor haduh T. 4 klur.
Kine ki drok ki dei kiba la ïoh kurup na ki bynta jong ka East Khasi Hills, Ri-Bhoi, West Khasi Khasi Hills bad West Jaiñtia Hills.
Ïa ka jingthang ïa kitei ki drok la pynlong ha ka karkhana shna dewbilat Star Cement kaba don ha Lumshnong, East Jaiñtia Hills.
Ha kane ka sngi, la donlang u heh duh ki pulit ka jylla, u Dr L R Bishnoi ha ryngkat kiwei pat ki heh pulit ban sakhi ïa ka jingthang jong kitei ki drok. Ha kajuh ka por, la sakhi lang ïa kane ka jingthang ïa ki drok da ki nongthoh khubor bad ki dkhot jong ki Village Defence Party (VDP).
Ka jingthang ïa kine ki drok ka dei hadien ba ka ïingbishar ka la ai jingmynjur. Na ka liang u Dr Bishnoi u la ïathuh ba ka ïingbishar ka la ai hukum ban thang ïa kitei ki drok kiba la ïoh ban kurup na kylleng ki jaka ba kynthup ha kaba ïadei bad 10 tylli ki mukotduma ha East Khasi Hills, 2 tylli ha Ri-Bhoi, 25 tylli na West Jaiñtia Hills bad kumjuh ruh 14 tylli na West Khasi Hills.
Haba kren bad ki nongthoh khubor, u Dr Bishnoi u la ai khublei ïa ka Lumshnong kaba la ailad ban thang ïa utei u drok ha katei ka jaka.
Ha kajuh ka por, u DGP u la ïathuh ruh ba hynne ka sngi, la ïoh ban thang ïa u drok Heroin uba kot haduh T. 3 klur, Ganja uba shongdor T. 80 lak, bad kiwei pat ki drok ba shongdor kumba T. 20 lak.
Kane kam dei ka sien banyngkong ba ki pulit ka jylla ki la thang ïa ki drok. Ha ki katto katne snem ba la leit noh, ka la don kajuh ka rukom thang hadien ba la ïoh jingmynjur na ka ïingbishar.
