Shillong, Naiwieng 09
Ki briew kiba la nohsynñiang ban shna phlim lem bad ki tyngshop bad ki puron kiba la khlad noh kiba ju donbynta ban shan phlim Khasi ki la ïoh ka jingpynkupburom lyngba ka jingpynlong ïa ka Kelvin Cinema Festival ha U Soso Tham Auditoirum, Shillong ha ka Sngi Palei.
Ïa ka kyrteng jong kane ka tamasa la pynwan na ka Kelvin Cinema Hall ha kane ka Jylla kaba la seng ha u snem 1926 da u (Rai Bahadur) Jeevan Ram Geonka. Ïa kane ka tamasa la wanrah da ka Jeevan Ram Mungi Devi Geonka Public Charitable Trust ha ryngkat ka jingïatreilang bad ka Fraternity Art Cine Entertainment Shillong.
Kane ka tamasa ha kaba yn don ruh ka jingpyni ïa ki phlim, ka long lai sngi haduh ka 11 tarik Naiwieng (sngi Saitjaiñ).
Ha ka sngi basdang ïa ka tamasa la pyni ruh ïa ka phlim Khasi kaba kyrteng ka Chithi nalor kiwei ki phlim ha kaba la don ruh ka jingïatai halor ka jinglong jingman jong ki phlim bad ka rukom pynwandur bad pynmih ïa ki phlim ha kane ka Jylla.
Ki Myntri Sorkar, ka Kong Ampareen Lyngdoh bad u Bah Kyrmen Shylla ki la wan ban sakhi lang ha kane ka sngi ba plie ïa kane ka tamasa.
Ki briew kiba la nohsynñiang ha ki kam shna phlim bad kiba la shim ruh ïa ka bynta jong ki ha ki phlim bapher bapher ki la shah pynkupburom kiba kynthup ïa ka Kong Destina Mawrie (ba la khlad) ba ju donbynta ban ak ha ki phlim Khasi, Bah Enshon Anjelus Lamare (ba la khlad) ba ju donbynta ban ak ha ki phlim Khasi kiba paw nalor ki jingpynbyrngia, nalor u kaitor Bah Headingson Ryntathiang bad u nongshna phlim na Assam, u Mina Ram Daimary.
