Shillong, Naiwieng 09
U National President ka National People’s Party (NPP) u Conrad K Sangma uba dei ruh u Myntri Rangbah ka jylla, u la ai ka jingmynjur ïa ka thup kyrteng jong ki dkhot bathymmai ka State Executive Committee (SEC) Meghalaya NPP hapoh ka jingïalam jong u Bah Prestone Tynsong kum u President.
Kane ka jingai jingmynjur jong u National President ka la long hadien ba u Bah Prestone uba dei ruh u Symbud Myntri Rangbah ka Jylla, ha ka Sngi Palei u la thoh bad phah ka jingtyrwa ïa ka thup kyrteng ki dkhot bathymmai ka SEC sha u National President ka NPP u Conrad K Sangma.
Ki nongkitkam bad dkhot bathymmai ka SEC hapoh ka jingïalam u Bah Prestone Tynsong kum u President, ki kynthup lai ngut ki Working President kata u Marcuise N Marak uba dei u Myntri, u MLA ka Jowai Bah Wailadmiki Shylla bad u MLA barim ka Mylliem u Bah Hamletson Dohling bad ruh lai ngut ki Vice President kata u Deputy Speaker Timothy D Shira, u Myntri Sorkar u Bah Comingone Ymbon bad u MLA ka Jirang Bah Sosthenes Sohtun.
Nalor kitei, la thung ruh ïa ki hynriew ngut kum ki General Secretary kata u Dr. Charles Reuben Lyngdoh (in-charge Administration), Prof. Donkupar War (in-charge Organization), Bah Forward L Mawlong, Ian Botham K Sangma, MLA, JD Sangma bad Abdus Saleh.
Ha kane ka thup ki don ruh haduh 21 ngut ki Secretary ba kynthup ïa u Bah Samlin Malngiang, Bah Kupar Blah, Bah Mebanri Laloo, Dr David A Kharchandy, Bah Ransom Sutnga, Bah Jason Sawkmie Mawlong, Bah Teibor Pathaw, MDC (in-charge Media Cell), Bah Auspicious L Mawphlang, Bah Kimfa Marbaniang, Bah Emlang Lyttan, Bah Embhahlang Syiemlieh, Bah Raynold Kharkamni, Bah Barfi Toi, Sengchim N Sangma, MLA, Subir R Marak, MLA, Charming N Sangma, Aloysius Marak, Nidhuram Hajong, Limison D Sangma MLA, Rakesh A Sangma, MDC bad u Crozier G Momin, MDC. Katba u Bah Daniel Thangkhiew u la shah thung kum u Treasurer.
Nalor kine, baroh ki MLA, ki Chairman, Deputy Chairman, CEM, Deputy CEM jong ki District Council, President State Women’s Wing, President Youth Wing kin long ki dkhot ka executive committee katba la jied ïa u Babeth K Sangma bad Nihim D Shira kum ki nongaibuit jong ka seng.
Katba ïa u MLA barim ka Mawsynram u Bah Himalaya M Shangpliang la thung kum u nongaiktien jong ka NPP.
