Shillong, Naiwieng 09
Ka jingjyllei jong ki nongdawa pisa beaiñ ha ki surokbah na ki trok kit mar ka la long kaba shyrkhei haduh katta katta ha kaba ha kane ka sien kaba mynta ruh, na ka liang ka tnad pulit ka la ïoh ban kem ïa ki lai ngut ki briew kiba la donkti ha ka ban dawa pisa na kawei ka kali kit jhur ha ka 6 tarik u Naiwieng, 2023 ha Mawlai By Pass. Lyngba kane ka jingjia, ka la pynlong ïa ka kynhun ki nongdie jhur ka jylla ban buh ka jingmaham kaba tyngeh ïa ki runar kiba donkti ha kum kine jait kam.
Kum ban shu kdew hangne, ka kyrwoh ba la phah lyngba u Superintendent of Police (SP) City ka East Khasi Hills District, u Bah Vivek Syiem, IPS, ha ka 8 tarik u Naiwieng, 2023 ka la pyntip ba don ki kynhun runar kiba pynngop ïa ki nongñiah kali kit jhur da kaba pynbor ïa ki malik jong ki ban thied jhur ha ka dor kaba kham tad bad kitei ki runar ki la ïalam ïa kitei ki nongñiah kali sha Inter State Bus Terminal (ISBT) ha Mawïong lane sha Umïam ban leit thep ïa ki jhur bad ynda poi sha ki jaka kiba kham kynjah, kitei ki runar ki la pynbor pat ïa ki nongñiah kali ban phone ïa ki malik ban pyntip ba ki la dep ban die ïa u jhur bad nangta pat kitei ki malik kin phah pisa lyngba ka ‘Google Pay’ sha kitei ki briew kiba kam ïalade kum ki nongdie jhur.
Na ka liang ka Special Cell ka East Khasi Hills ha ryngkat ka jingïarap jong ki dkhot ka Meghalaya Traders Fresh Vegetable and Ginger Association bad ka Khasi Jaiñtia Fresh Vegetables Suppliers Association, ka la pynlong ïa ka jingkhynra ha ka 6 tarik u Naiwieng, 2023 ha kaba la ïoh ban kem ïa ki lai ngut ki briew na Mawlai Bypass bad haduh mynta ka jingthwet ïa kiwei pat kiba donkti kiba dang phet rieh ka dang ïaid shakhmat.
Haba kren sha ki lad pathai khubor ha ka Sngi Palei, u Bah Ferdinand Mawrie kum General Secretary ka Meghalaya Traders Fresh Vegetables & Ginger Association, u la ïathuh ba ha shwa ka 6 tarik u Naiwieng 2023, ka kynhun ka la ïoh ïa ka jingujor ba ki don ki briew kiba la phone ïa ki mahajon kiba don shapoh Assam ha kaba ki la kam ïalade ba ki dei ki nongkhaïi jhur bad kitei ki nongdawa pisa ki la byrngem ïa ki draibar jong ki mahajon ban siew pisa da kaba kynnoh ba u mahajon jong ki u la shah ram pisa ha ki.
U Bah Mawrie u la ïathuh ba kitei ki runar ki la rahbor ïa u nongñiah trok kit jhur na lad Smit bad phah ïa u ban phone kylla ïa u malik bad ban pan pisa lyngba ka ‘Google Pay’.
U Bah Mawrie u la ïathuh ba kum kane ka jingdawa pisa ka la ju jia la kumba saw sien, bad ha u snem 2022, uwei u mahajon jhur u la leit ban ujor da ka ejahar halor kane ka jingjia sha ki bor pulit hynrei katei ka jingujor ka la long lehnohei. Kumta dei ha kane ka sien kaba mynta pat, na ka liang ka kynhun ka la mih shakhmat ban pan jingïarap na ka tnad pulit bad ka la ïoh ban bat ïa kitei ki briew kiba donkti ban dawa pisa.
“Ngi sngew ban ai khublei ïa ka tnad pulit kaba la trei shitom ha kaba ïadei bad kane namar ba lehse, mynta ki dang sdang tang kumne hynrei lashai lashisngi lada ka tnad kam leh eiei lane ngim leh eiei, ka lah ban poi hadien habud ba wat ki draibar ne ki mahajon jhur kiba don shabar kim treh shuh ban wan leh khaïi hangne hapoh ka jylla ka jong ngi namar ba la jur eh ki kam sniew”, la kubur u Bah Mawrie.
Katei ka kynhun ka la maham da kaba tyngeh ruh ïa kino kino kiba shu kwah pisa suk da kaba dawa pisa na ki trok ba kim bit satia ban leh ïa kum kine ki kam ïoh ba ki ngat ei ha ka jingshah kem. Na ka liang ka seng kan trei shitom ban nym ailad ba kum kine ki jingjia kin dang ïai jia nangne shakhmat, ba ïoh lehse kan poi pynban sha kano-kano ka jingjia kaba sngewsih.
Na ka liang u Bah Henry Dkhar, Working President Khasi Jaiñtia Fresh Vegetables Suppliers Association, u la ai khublei ïa ka tnad pulit kaba trei shitom ban ïoh kem ïa kitei lai ngut kiba la dawa pisa. U kyrpad jur ruh ïa ka tnad pulit ba kan dang ïai thwet ïa ki briew kiba donkti ban dawa khnang ban duhjait shisyndon ïa kum kine ki jait briew.
