Jowai, Naiwieng 09
Ka tnat Animal Husbandry and Veterinary, Directorate of Dairy Development, West Jaiñtia Hills ha ka 9 tarik ka la pynlong ïa ka prokram ai jingpynshai halor ka jingdonkam ban dih ïa ka dud kaba long shibynta ka jingleh burom ïa ka National Milk Day ka ban long ha ka 26 tarik mynta bnai.
Ïa ka jingïalang la pynlong ha Iungwalieh ka Chilliangraij ha ka jingwan ïashim bynta ki khynnah skul ryngkat ki nonghikai ka Chilliangraij Govt. LPS, Chilliangraij SSA UPS, Loompyrdi Iongpiah UPS SSA, Pohmusiang UPS SSA bad ka Panaliar UPS SSA.
Ki ‘riew shemphang kiba la wan ban ai jingbatai shaphang ka jingmyntoi jong ka dud ki long ka Kong Mebel Shylla, Senior Dairy Officer, tnat Animal Husbandry and Veterinary, Directorate of Dairy Development, West Jaintia Hills bad u Bah E Wann, Dairy Technology, Directorate of Dairy Development, West Jaiñtia Hills.
Ka Kong Mebel Shylla ka la kyntu ïa ki School Managing Committee ba haba ai ja sngi (Midday Meal) ïa ki khynnah dei ban ai lang teng-teng bad ka dud khnang ba ki khynnah kin ïoh ïa ka Nutrient bad Vitamin bad na ka liang jong ka ruh ka la kular ban ai ‘distributor rate’ sha ki skul kiba shim bad ai dud ïa ki khynnah.
Haba kut ka jingïalang la ïoh ki kyntien khublei na u Bah Oriland Shylla, General Secretary Chnong Chilliangraij, Jowai bad ïa ka jingïalang la pynwai da kaba sam dud ei sha baroh ki khynnah skul bad nonghikai.
