Shillong, Naiwieng 09
Ka Hynñiewtrep Integrated Territorial Organisation (HITO) Ri Bhoi District ha ka Sngi Palei ka la leit ban ujor ha u Deputy Commissioner (DC) jong ka Ri Bhoi District bad ban dawa ba u dei ban phah kem mardor ïa ki briew kiba donkti ban dawa pisa beaiñ na ki trok kit syiar kiba rung shapoh ka jylla.
Na ka liang ka seng ka la ong ba ka jingleit ujor jong ka seng HITO sha u DC ka dei hadien ba ka la ïoh jingtip kaba tikna ba ki ju don ki riewshim kabu kiba dawa pisa jubor haduh T.30,000 na kawei-pa-kawei ka kali kit syiar kaba ju pynpoi ïa ki syiar ha Byrnihat.
“Na ka liang jong ngi ka HITO, ngi la wan ban buh ka shithi jingujor hangne ha u Deputy Commissioner bad nangta ngi la leit ban buh ruh ha u Superintendent of Police(SP) ka Ri Bhoi District”, la ong ka seng.
Ka seng ka la ong ruh ba ka jingïoh dawa pisa jong kitei ki riewshim kabu haduh T.30,000 na kawei-pa-kawei ka trok kit syiar hapoh Byrnihat ka dei namar ba kitei ki syiar kiba wan poi ki dei kiba nabar ka jylla.
Shuh shuh ka seng ka la dawa ruh ïa ka sorkar jylla ba kan leh eiei halor kane ka bynta bad ba kan buh ruh da ka khyrdop hapoh Byrnihat na ka bynta ki kali kit syiar bad ban lait ruh na kano-kano ka jingwanrah ïa ki syiar kiba pang shapoh ka jylla.
“Ngi kyrpad ba kin leh eiei halor kane bad ngin buh por ruh hapoh ka shitaïew halor jong kane ka dorkhas kaba ngi la buh bad lada kim leh eiei halor kane ka mat kaba ngi la ïakren, nga tharai ngim banse ba ngin ïaid shakhmat na ka liang ka seng”, la ong ka seng.
