Shillong, Naiwieng 09
Wat lada ka don ka lad ban pynmih kham bun ka bording ilektrik, hynrei ka Jylla ka ïa tyngkhuh mawsiang mynta ha ka liang ka jingbei pisa khamtam ban ïoh ka ram ryngkat ka sut kaba rit.
U Myntri ka tnat bording u AT Mondal u la kubur ba ka Jylla ka don ka lad ban tei ïa ki projek kiba lah ban pynmih bording da kaba tan ïa ka um sha ki jaka pyllang um hynrei kam long kaba suk namar ka jinglut ka bun bha.
Ïa kine ki projek kiba shu tan um, la tip kum ki “Pumped Hydro Storage Project (PHSP).”
U Mondal u la ai nuksa ha Arunachal ha kaba ki projek kiba lah ban pynmih bording haduh 11,500 megawatt lane 11.5 gigawatt, ka jingbei pisa ka long kumba T.1.25 lak klur.
“Kine ki projek ki donkam shibun ka jingmang pisa, bad ka Jylla ka donkam ban ïoh ïa ka jingbei pisa ha ryngkat ka sut kaba rit,” u la ong.
U Mondal u la ong ba kum kine ki projek (PHSP) lada don ka lad ban tei ha Meghalaya, kan weng ïa ka jingeh kaba hap ban mad namar ka jingpynlip bording ilektrik.
U la ong ba bun ki jylla ruh ki la beh ban ïoh pyntreikam da kum kine ki projek ha kaba ka rukom bei pisa ruh ka long kaba heh bha.
Kine ki projek ki donkam ban shna ar tylli ki jaka pyllang um khnang ban lah pynmih bording ha baroh ki samoi.
U la ong ba ka Jylla ka don 4 tylli ki jaka kiba lah pyntreikam ïa kum kane ka projek kaba shu tan um, ha kaba ka jingpynmih bording kan long kumba 3,100 MW lane 3.1 gigawatt.
Une u Myntri ka tnat bording u la ong ba haba kut artad u Nohprah mynta u snem, yn sa ïoh ïa ki kaiphod kiba tikna haba ïadei bad ki 4 tylli ki jaka ban tei ïa kine ki projek ha kaba yn sa tip ruh katno ka jinglut kaba hap ban bei pisa.
