Shillong, Naiwieng:
U Marcuise N Marak uba dei u Myntri ka Sorkar Jylla bad ha kajuh ka por u Nongaiktien ka NPP, u la ong ba kam don satia kano-kano ka jingïapait ne ïapher jingmut hapdeng ki nongïalam ka NPP ha kaba ïadei bad ka jingjied ïa u kyrtong ban ïakhun ha ka ilekshon MP sha ïingdorbar Lok Sabha ka ban long ha u snem ban wan na Shillong Parliamentary Constituency.
“Ka dei ka seng saiñ pyrthei, ha kaba ngi don ïa ki nongïalam kiba bun bad kumta kin don beit ki jingpyni nia la ki jong ki jong. Ngi dei ka seng kaba shim beit ïa ka rai ïamon lang bad na ka bynta kane, ngi donkam ban don ïa la ki jong ki jong ki jingai jingmut bad dei namar kata ba ka jingïakren ka la ïaid shakhmat bad ynda ngi la dep ban ïakren, ngin sa shim lang ïa kawei ka rai. Kumta kam don satia ka jingïapher jingmut,” la ong u Marcuise haba kren sha ki lad pathai khubor ha ka sngi Balang.
U Myntri u la ong ba ka komiti kaba la don ban jied ïa ki kyrtong kan sa phah ïa ka kyrteng jong ki kyrtong sha ka High Command ka seng bad ha kaba ka High Command kan sa shim rai katkum ki jingtip kiba don ba mano napdeng ki kyrtong kiba don ka thong ban poi sha ka jingjop bad hangta ka seng kan sa shim rai.
Kane ka jingpynpaw u Marcuise ka la long hadien ka jingmih ki khubor ba kynnoh ba ka la don ka jingïapher jingmut hapdeng ki nongïalam ka seng, kata hadien ba u Symbud Myntri Rangbah ka jylla u Bah Sniawbhalang Dhar u la kwah ba ka NPP ka dei ban ai tiket MP ïa u pyrsa jong u, u Bah Dasakhiat Lamare uba dei ruh u MLA barim ka Mawhati bad Myntri barim ka jylla.
Katkum ki tyllong khubor la ong ba ki la don ki nongïalam hapoh ka seng ki bym sngewtynnad halor kane ka jingtyrwa kaba la wan na ki Dhar.
Hynrei na ka liang u Marcuise u la ong ba um don jingtip satia halor ka jingdon jong kum kane ka jingtyrwa bad kumta un hap ban ïoh jingtip shwa kham bniah shwa ba un kren eiei halor kane.
“Ngim don ka jingtip kaba bniah hynrei ki don katto katne ki kyrtong. U Bah Himalaya Shangpliang, MLA barim ka Mawsynram ruh u don. Nga dang shu tip mynta sa ïa u Bah Dasakhiat Lamare. To ngin peit, bad ynda ka seng kan sa shim ïa ka rai ngin sa pyntip sha phi,” la ong une u nongaiktien ka seng.
Ha kaba ïadei pat bad ka jingmih ki khubor ba u MLA barim ka Umroi u Bah George B Lyngdoh un sa pynïasoh bad ka seng NPP, u Marcuise u la ong ba haduh mynta um don jingtip eiei halor kane.
