Jowai, Naiwieng:
Ka Election Commission jong ka Ri India, ka la ai hukum ban pynbiang ïa ka Draft Photo Electoral Roll jong ki Assembly Constituency ha ka District katkum ka 01.01.2024.
Kito ki nongshong shnong kiba la dap 18 snem ka rta katkum katei ka tarik, ki bym pat don kyrteng ha ka Draft Electoral Roll ki lah ban pynrung kyrteng ïalade ha ka Polling Station ba ki shong ki sah, kumjuh ruh ban ot ne weng kyrteng ïa kito kiba la ïap ne phet shnong noh bad ïa ki jingbakla ruh yn pynbeit ha kane ka por. Ha ka jingïadei bad kane, ïa ka Draft Photo Electoral Roll la pynmih ha ka 27.10.2023 ha ka shlem treikam jong u District Election Officer, ki Electoral Registration Officer bad lyngba ki Booth Level Officers ha ki Polling Station.
Ïa ki jingtyrwa bad jingdawa ne jingujor kyrteng yn pdiang naduh ka 27.10.2023 haduh ka 09.12.2023.
Ha kaba ïadei bad kane ka kam, la kyrpad jur ïa ki nongshong shnong ba kin sngewbha ban ïasnoh kti bad ka shlem treikam da kaba don ryngkat bad ki briew jong ka shlem treikam ki ban wan pynlong ïa ka prokram ai jingpynshai kum shi bynta jong ka SVEEP programme na ka bynta ki jingpynrung kyrteng bad ruh ban pynshai ïa ki kam kiba ïadei bad ka General Election to Lok Sabha (MP) ka ban sa long ha u snem 2024.
Ka jingïatreilang kan ïarap ïa ka shlem treikam bad ka Sorkar ruh kumjuh khnang ba ka kam kan long kaba ïaid beit bad kaba jop ban pynïoh ïa ka Photo Electoral Roll kaba beit, khuid bad paka.
