Shillong, Naiwieng 10
Ka Sorkar Jylla kaba la sdang ban pyntreikam ïa ka Solar Mission kaba pynshlur ban tan bording na ka sngi, kan sa kyrpad ïa ka Sorkar Pdeng ban ai jingïarap (subsidy) na ka bynta kito kiba kwah ban buh ïa ki kor ki bor halor tnum ban tan bording na ka sngi kaba tip kum ka ‘rooftop solar plant’.
U Myntri ka tnat bording, u AT Mondal u la ong ba ym pat lah ban leh ïa ka Solar Park namar ka heh ka jinglut bad dang pyrshang ban pynwan ïa ka bording na ka Park sha ka Grid ha kaba donkam ban kyrpad ban pynrung kum ka subsidy na ka bynta ki ‘transmission line’.
“Kum kine ki mat ngin leit ïakren biang bad Myntri ka Sorkar Pdeng ba peit ïa ka tnat bording namar u la dep ong ruh ba u kloi ban ïashem bad ngi bad sngap ïa ki jingeh jong ngi,” la ong u Mondal.
U Mondal u la ong ba ka ‘Rooftop Solar Plant’ ka dei kaba bun ki ri ka pyrthei ki la leh bad donkam ban pynshlur ïa ki briew ban leh ïa kane namar ka ïarap shisha ban pynmih bording.
U la ong ba ki ri kum ka Germany, Australia bad kiwei pat ki la lah ban leh ha ka rukom kaba heh bad ha kane ka Jylla ruh lah ban leh ïa kane ha kaba ka dor kan long hapdeng T.3 lane T.2 .50.
“Ngi la ïathuh ba la pyllait ïa ka Chief Minister Solar Mission hynrei ym don ka jingpynbna ban ai subsidy na ka bynta kane. Kumta ïa kane ka mat yn sa leit rah biang sha Delhi bad lada ïoh, kan kham pynsting ïa ngi ka Jylla,” la ong u Myntri uba la ïashimbynta ruh dang shen bad ha ka jingïalang jong ka tnat bording ha Delhi ha kaba la ïakren shibun ki jingeh jong ki Jylla.
