Nongpoh, Naiwieng 10
U President ka Ri-Bhoi Youth Organisation (RBYO), u Bah Baïateilang Lapang u la shah bat noh ha ki bor pulit ka Ri-Bhoi ha ka janmiet Sngi Palei halor ka jingkynnoh donkti ban dawa pisa na kawei ka jaka theh umphniang kaba don ha ki thaiñ Byrnihat.
Na ka liang u Superintendent of Police ka Ri-Bhoi, u Giri Prasad u la pyntikna halor ka jingbat jong ki bor pulit ïa utei u nongïalam ka RBYO da kaba pynshai ruh ba ki bor pulit kim shym la kem ïa u, hynrei la shu bat katkum ka kyndon 41A jong ka CrPC ban pynlong ka jingtohkit halor ka mukotduma kaba la ujor ha Nongpoh Police Station kaba don ïa ka Case No 124 (11) 2023 hapoh ki kyndon 384/506/34 jong ka Indian Penal Code (IPC).
