Nongpoh, Naiwieng 10
Ka Confederation of Ri-Bhoi People (CoRP) ka la pynpaw ïa ka jing-sngewkhia kaba jur halor ka jingpynmih jong ka Meghalaya Industrial Development Corporation (MIDC) tang kawei ka ‘Tender’ kaba kot palat T. 8 klur ha MIDC Umïam kaba pynlong ïa kiba bun ki kontraktor barit baria ba kin ym ïoh ban trei ïa katei ka kam.
U President ka CoRP, u Bah Bandari Rynta-thiang haba kren sha ki lad pathai khubor ha Nongpoh ha ka janmiet Sngi Thohdieng u la ong ba kum ki samla ka Ri-Bhoi ki dap da ka jingsngewkhia kaba jur halor katei ka jingleh ka MIDC kaba thmu ban pynriewspah tang ïa ki katto-katne ki heh saipan.
U la ong ruh ha kane ka kam, ki don shibun ki bynta ba ki kontraktor ka thaiñ ki lah ban trei bad dawa ba ka Sorkar ka dei ban phiah ïa katei ka ‘Tender’ kaba T. 8 klur tam ban ailad lem ïa ki kontraktor barit jong ka thaiñ ba kin ïoh ban trei ïa ka kam namar kumba long mynta ki kontraktor klas-III ki shu kut tang ha ka jingpynthymmai ïa ki kot ki sla khlem kam khlem jam.
Shuh shuh u Bah Bandari Ryntathiang u la bynrap ba lada jia ba ka Sorkar kam sngap ïa katei ka jingdawa jong ka seng bad khamtam eh lada ïa katei ka kam yn ai sha ki kompeni bar jylla, ka seng kan ym ailad satia ba kin pyntrei ïa katei ka kam.
