Nongpoh, Naiwieng:
Ka Confederation of Ri Bhoi People (CoRP) ha ka Sngi Balang ka la leit ban ujor sha u Additional Deputy Commissioner ka Ri Bhoi District, u Raja Bramah halor ka jingkynnoh donkti jong katto-katne ngut ki rangbah ban pyndonkam da ki kynja bom ban pynïap dohkha ha ka wah Umsiang kaba la pynlong ïa ka jingïap pathar jong ki doh um doh wah ha katei ka wah.
Katkum ka shithi kaba ka seng ka la aiti sha u Additional Deputy Commissioner, la ïathuh ba ki lai ngut ki rangbah ba kynthup ïa u Bah Phring Madur, u Bah Shanbor Sulein bad u Bah Droming Langi ki la wan ban kynduh ïa ki nongïalam ka seng ban ïathuh ba ha ka 27 tarik jong u Risaw 2023 ki la don kumba katto katne ki briew kiba pyndonkam ïa ki bom ban pynïap ïa ki dohkha ha ka Thwei Ksih Um bad Bora Umlapong kaba hap ha ka Wah Umsiang.
Halor kane ka bynta, na ka liang u President ka CoRP, u Bah Bandari Ryntathiang haba kren sha ki lad pathai khubor hadien ka jingkynduh ïa u ADC ka Ri Bhoi, u Raja Brahma, u la ïathuh ba na ka liang u ADC u la kular ban shimkhia halor kane ka bynta ban pynlong ïa ka jingtohkit ban lap ïa ka jingshisha halor katei ka jingpynïap dusmon ïa ki doh um doh wah ha katei ka wah bad ban kem mardor ïa ki briew kiba donkti ban leh ïa katei ka kam beaiñ.
Ha kajuh ka por u la ai ruh ka jingmaham kaba tyngeh ba lada ka seng ka lap hi ïa kum kitei ki briew kiba leh ïa kitei ki jait kam kiba pynsniew dur ïa ka mariang bad ki wah nangne shakhmat, kin ngat ha ka jingeh bad ka jingpynshitom kaba khraw.
