Shillong, Naiwieng 10
U President ka NPP South West Khasi Hills District, Bah Kitbok Nongrem, u la pyntip ba ki la don ki nongkitkam kiba la pynpaw ba kin pan tiket na ka seng NPP ban ïakhun ïa ka ilekshon MDC na Langrin bad Mawkyrwat konstitwensi lada jia ba kan long ha u snem 2024.
U Bah Kitbok u la ong ba hadien ba ka seng kam shym la ïoh ban pynïeng kyrtong ha ka ilekshon MLA na Ranikor konstitwensi namar ka jingphet jyndat u MM Danggo hadien ba la dep pynbna ïa ka tiket hynrei ka seng kan pynïeng beit ïa u kyrtong ha ka ilekshon MDC na Langrin konstitwensi.
U la ïathuh ba ha Langrin konstitwensi ki la don kumba lai ngut eiei ki nongkyrshan ka seng NPP kiba la pynpaw ba kin pan tiket MDC lada ka seng ka la wad kyrtong.
Nalor nangta u la ïathuh ruh ba ha Mawkyrwat ruh ki la don katto-katne ngut ki nongkyrshan kiba la pynpaw ïa kajuh ba ki kwah ban ïakhun ïa ka ilekshon MDC lada ka seng kan ai tiket.
U Bah Nongrem u la ong ba ha shwa ka ilekshon MLA, u kyrtong ba ka seng ka la dep pynbna kata u MM Danggo u la mih noh ban rung sha kawei pat ka seng saiñpyrthei hynrei ki nongkyrshan ki khlem duh jingkyrmen namar ha kane ka ilekshon MDC kin sa pyntikna ban pynïeng kyrtong beit.
Halor ka jingjied ïa u kyrtong sha ka ilekshon MP Lok Sabha, u Bah Kitbok Nongrem uba dei ruh u President ka NPP Youth Wing, u la ong ba ïa kane ka kam u shaniah beit ha ka jingstad jong ki nongïalam ba ha khmat ba kin shim ïa ka rai.
Ha kajuh ka por u don jingkyrmen ba ka NPP kan jop bun ngut ki kyrtong ha ka ilekshon MDC na Khasi Hills Autonomous District Council (KHADC) bad Jaiñtia Hills Autonomous District Council (JHADC).
