Shillong, Naiwieng:
Ki nongñiah kali kamai na Laitumkhrah sha Polo ki la kynnoh ba ka jingpynïaid shi lynti ne ‘one way’ na Polo sha Saw Furlong kam shym la wanrah ïa ka jingkylluid ïa ka surok hynrei ka la wanrah pynban ka jingdheng kali namar ki kali ba ïaid na Saw Furlong sha Polo ki hap ban kiew sha ïingsah u Lat ka jylla, Nan Polok ban poi sha Polo.
Kane ka jingphah ïaid shi lynti na Polo sha Saw Furlong ka la sdang naduh ka 6 tarik mynta u bnai. Kane ka la ktah ïa ki nongñiah kali kamai na Laitumkhrah kiba leit buh briew sha Polo kiba hap ïaid na Demseiñïong sha Saw Furlong kiew sha ïingsah u Lat bad hiar na Nan Polok shaduh Polo ban pynhiar ïa kiba shong kali bad wanphai biang sha Saw Furlong.
Haba ïakren bad u Bah Tony Nongbri uba dei u Secretary ka Laitumkhrah Taxi Association, u la ïathuh ba kane ka jingphah ïaid na Saw Furlong sha ïingsah u Lat shaduh Polo ka la ktah ïa ki nongleit nongwan namar kim poi shuh ha ka por kaba biang namar ka jingdheng kali haduh Polo Tower hotel.
U la pyntip haba ki nongñiah kali ki la leit ïakynduh ïa ki bor pulit ki la ong ba kane ka dei tang ka jingpyrshang, hynrei ki kyrpad ba ka dang lah ban phah kumba leh mynshuwa ban nym ai shi lynti na Saw Furlong sha Polo khnang ban suk ïa kiba leit ba wan.
U la ong lada ïaid beit-beit na Saw Furlong sha Polo ka bam por tang shi minit. Lada hap ïaid kyllaiñ na Nan Polok, ka dheng kali ka bam por haduh shiteng kynta ne haduh shi kynta ban poi sha Polo.
Nalor kane, u la pyntip ruh ba kane ka jingïaid kyllaiñ ki bun ki paidbah ki khñium namar ki hap ban hiar noh shiteng lynti lada ka dheng kali.
“Ngi hap ban pyrkhat thymmai ïa ka bai kali lada ki pulit ki dang bteng ban phah ïaid kyllaiñ ïa ngi namar mynta ngi shim T.30 na Laitumkhrah sha Polo” u la ong.
