Shillong, Naiwieng 10
Ka jingïalang paidbah ba la khot pynlong da ka Joint Action Committee (JAC) halor ka jingpyrshah ban pynkut ïa ka tamasa Cherry Blossom ha ka 19 tarik u Naiwieng, 2023 kaba dei ka Sngi U Blei ka la pulom noh ha ka Sngi Thohdieng ka 10 tarik u Naiwieng, 2023 ha Bhoirymbong hadien ba ki bor shnong ka Bhoi-rymbong Lumdaitkhla ka khlem ai kano-kano ka jingmynjur ban pynlong ïa katei ka jingïalang ha katei ka sngi.
Wat la na ka liang ka JAC ka la thmu ban pynïaid shakhmat ïa katei ka jingïalang khlem ka jingdon ryngkat lang jong u Chairman u Bah Baïateilang Lapang hadien ba u la shah kem noh ha ka miet jong ka 9 tarik u Naiwieng, 2023 halor ka jingsuba donkti ban dawa pisa na ka Petrol Pump.
Ka Kong Purity Phawa kaba dei ka nongïalam jong ka Saiñdur Tipkur-Tipkha Ïeng Ehrngiew Hynñiewtrep (STIEH) ka la ong ba ka JAC ha katei ka sngi ka la khot da ka jingïalang ban ïoh pynshai paidbah hynrei namar ba ka shnong ka khlem ai satia kano-kano ka jingmynjur ban pynlong ïa katei ka jingïalang ha katei ka sngi, kumta na ka liang ka JAC ka khlem ïohlad satia ban pynlong ïa ka jingïalang.
“Ngim kwah ban leh donbor bad ngi la sangeh noh ïa kane ka jingïalang paidbah jong ngi”, la ong ka Kong Phawa.
Ka Kong Phawa ka la buh jingkylli ba lada ka sorkar jylla kaba dei ka khlieh nongsynshar hapoh ka jylla kan pynlong kum kine ki tamasa ha ka Sngi U Blei, shano yn lah ban khang ïa ka jingpynlong ïa ki Mela, ki Fete, ki jingkhwai ha ki Sngi U Blei,” la ong ka Kong Phawa.
Ka Kong Phawa ka la pynpaw ruh ka jingsngew burom ïa ka Ribhoi Mihngi Presbytery bad kumjuh ruh ïa ki katto katne ki riewngeit na ki Balang Khristan bapher bapher bad kumjuh ïa u nongmihkhmat ka Mawhati, u Bah Charles Marngar, kiba la pynpaw ka jingsngewkhia halor ka jingpynkut ïa ka tamasa Cherry Blossom ha ka Sngi U Blei.
Ka Kong Purity ka la ther da kaba tyngeh ruh ïa u Myntri ka sorkar jylla uba dei khmih ïa ka tnad ki kam jngoh kai pyrthei, u Bah Paul Lyngdoh uba khlem ailad satia ïa ka JAC ban ïakynduh bad u ban ïakren ha kaba ïadei bad ka jingpyrshah ïa ka jingpynkut ïa ka tamasa Cherry Blossom ha ka Sngi U Blei.
“Ngi kyrpad ïa u Myntri ka sorkar jylla uba dei khmih ïa ka tnad ki kam jngoh kai pyrthei, u Bah Paul Lyngdoh ha kaba ngi tip ruh ba phi dei u khun khristan bad kham bun kiba don hapoh ka kynhun Myntri ruh ki dei ki khun khristan, ngi ngeit ba phi sngewthuh thik-thik kaei kane ka Sngi U Blei”, la ong ka Kong Phawa.
Shuh shuh ka Kong Phawa ka la pynkynmaw ruh ba ha ki snem kiba la dep, u Bah Paul u la long kum u nongïalam uba la ïalam ïa ki paidbah hynrei mynta ki dienjat jong u ki dei ki matti kiba u la ïalam ïa ki paidbah.
“Hato kine ki matti jong phi, phi kwah ban lilam noh mynta lyngba ka shuki sorkar? Pyrkhat bha Bah Paul, lada phi dang dei shisha uta u doh u snam uba dei shisha u khun ba dap pura jong ka ri bad ka jaitbynriew, pyrkhat da ki spah sien ba phin sngewthuh ban pynkynriah tarik noh”, la ong ka Kong Phawa.
Ka JAC ka la pynrem jur ruh ïa ka sorkar jylla kaba la leh donbor ba wat tang ban pynlong ïa ka jingïalang ban pynpaw ïa ki jingpyrshah jong ki ruh ki khlem ïohlad satia. Kane ka jingshah khang lad ban pynlong ïa ka jingïalang paidbah ka la long kum ka jingshah synshar donbor jongno-re-jongno ym ka synshar paidbah.
