Shillong, Naiwieng 10
Ki bor pynïaid ka North Eastern Hill University (NEHU) ki la khot ïa ka JAC-NEHU sha ka miej ïakren hadien ba ka kynhun ka la pynbna ïa ka jingïakhih sangeh treikam ba khlem por ka ban sdang naduh ka 13 tarik mynta u bnai.
“Ka skulbah ha ka samoi pule ba mynta ka bunkam haba ïadei bad ki jingpule ba kynthup ïa ka jingpyndep jong ka ‘syllabus’ bad ki eksamin ba la buh ban pynlong ha ka bynta ba sdang jong u Nohprah. Ka jingpynthut ha ka rukom jong ki jingïakhih ba khlem buh por bad kiba khlem ka jingpynshisha kan sa ktah ïa kine kiei-kiei baroh, kumjuh ïa ka jinglong-jingman jong ka skulbah,” la ong u Vice-Chancellor (VC) ka skulbah, Prof. P.S. Shukla ha ka kyrwoh khubor.
U la ong ruh ba ka skulbah ka kyrpad ïa kito (JAC) ban wan sha ka miej ïakren, kumjuh ban ïamir jingmut bad pynshisha halor ki jingkdew jong ki bad ki sienjam ba la shim da ka skulbah ha ka jaka ban mih bad pyrshah khlem da pyntip halor katei naba ki kynhun nongïakhih ruh ki dei shi bynta jong ka skulbah bad ki tip shaphang ka jingïaid jong ki kam ki jam bad ki sienjam ba la shim da ka skulbah halor ka thup jingdawa.
“Kino-kino ki jingpynthut ha kane ka por jong ka samoi pule, kan ktah ym tang ha ka ban pyndep ïa ka ‘syllabus’ ha ka por ba biang, hynrei ïa ka jingïaid beit ïaid ryntih jong ki eksamin ba kynthup ïa ki samla pule – ka nongrim kaba la seng ïa ka skulbah ha kaba nyngkong eh,” u la ong.
Ha kawei ka liang u Prof. Shukla u la ong u la dep pynshai ïa ka bynta haba ïadei bad ka jingthung kam ïa u Rohit Prasad ha ka jingïakynduh bad ki lad pathai khubor ha ka taïew ba la dep.
“Haba phai sha ka jingthung ïa ki ‘Statutory Officer’ bad ‘University Engineer’, ka ‘interview’ na bynta kitei ki kam la buh ban long ha ka 20 bad 22 tarik Naiwieng, 2023 bad ka jingpynkhreh ïa kane ka dang ïaid shakhmat,” u la ong.
Haba kren halor kiwei pat ki mat jingdawa jong ka JAC, u VC u la bynrap ba haba ïadei bad ka University Health Centre (UHC), ka komiti ka la shim ïa ki sienjam bad leh ïa ki jingdonkam na ka ‘portal’ katkum ka jingbthah ka Sorkar India – ka jingmynjur kaba la ai jingbit ha ka 1 tarik u Naiwieng.
“Na bynta ka jingthied ïa ki tiar ki tar ha ki tnad pule bapher-bapher bad bynta jong ka skulbah, la kynthup ïa ka GeM ‘portal’ bad la dep pynlong ïa 3 tylli ki prokram ai jinghikai ban pynsngewthuh ïa ki nongtrei halor ka jingïathied lyngba ka GeM,” u la ong.
Halor ka jingdawa ban pyllait ïa ki nonghikai bad nongtrei ‘technical’ ban trei ïa kiwei pat ki jait kam, u VC u la ong ba ki nonghikai kiba trei ïa kiwei pat ki kam nalor ka kam hikai (ha ki kam ophis) ka dei na bynta ka jingïaid beit jong ka kam ka jam ha skulbah khnang ba ka jingtreikam ka skulbah kan ym sahteng bad yn pyllait ïa ki nonghikai mar syn dep pyndap ïa ki kam ha kaba ka jingpynbna ba donkam bad ka jingthung kam halor katei ka bynta ka dang ïaid.
Haba phai sha ka jingai kam shuh ïa ki nongtrei (ki bym hikai) ha ki kam ophis, u la ong ki la leh ïa kane wat ha shuwa ba un wan pynïasoh ma u sha ka skulbah.
“Haba ïadei bad ki kam jong ki ‘Statute’ bad ki aiñ, kine kijuh ki don ha ka ‘webpage’ jong ka skulbah ha ka bynta shaphang ka skulbah bad kaba pynlong ishu ïa ki bym don ishu kan pynthohbria ïa ka skulbah bad sha kito kiba dei, la kyrpad ban pynshisha hashuwa ban pynbna ïa ki kum ki mat jingïakhih,” ong ki bor pynïaid ka NEHU.
Haba phai sha ka jingai ‘mark’ ha ki eksamin jong ka skulbah, kane ka dei ka mat treikam kaba la shim rai katkum ki kyndon ka NEP-2020 bad kino-kino ki jingwanrah jingkylla kiba donkam nangne shakhmat dei ban buh hakhmat ka Academic Council.
