Shillong, Naiwieng 10
Wat la ka Executive Committee ka Khasi Hills Autonomous District Council (KHADC) hapoh ka jingïalam u Bah Pynïaid Sing Syiem ka la pynkhreh ban pynlong ïa ka Monolith Festival ha Khasi Heritage Village ha Mawphlang, hynrei la ïoh jingtip ba kane ka jingpynkhreh kan nym lah ban urlong ha u bnai Nohprah, 2023.
Kum ban shu pynkynmaw, ka EC ka la pynkhreh ban pynlong naduh ka 14 tarik haduh 16 tarik Nohprah, 2023 hynrei la sngewthuh ba ka jingpynkhreh jingpynkhrum ïa kane ka tamasa kan nym lah ban pyndep ha u bnai Nohprah. Kumta ïa kane ka tamasa kaba pyni ïa ka jinglong tynrai u Khasi lah ban rah sha u Kyllalyngkot, 2024.
Ki khubor ki ïathuh ba ka Executive Committee ka kwah ban pynlong ïa kane ka tamasa ha u Nohprah, 2023 ha shwa ba ki paidbah kin jied pynthymmai ïa nongmihkhmat MDC ha u Rymphang, 2024 kumba ju long man ka por.
Shuh shuh ki khubor ki ïathuh ba lada ym lah ban pynlong ha u Nohprah, kane ka tamasa Monolith Festival ka lah ban dang slem lada wan sa kawei ka Executive Committee kaba thymmai.
Haduh mynta ka jingshna pynbha ïa ka Khasi Heritage Village kaba don ha Mawphlang ka dang ïaid shakhmat.
Ïa kane ka Monolith Festival la pynïaid da ka KHADC ryngkat ka jingïatreilang bad ka tnad Jngohkai Pyrthei jong ka Sorkar Jylla bad ka Hima Mawphlang.
Ha ka jingjurip u nonglum khubor ha kine ki bnai ba la dep, la ïohi ba la sdang ban maramot ïa ki ïing trep kiba la jot da ki siej kiba thymmai.
Nangta ki hap ban ker da ki siej ïa sawdong jong ka Khasi Heritage Village kaba don pyrshah ïa ka ‘law kyntang.
