Shillong Naiwieng 10
Ki bor pynïaid district ki la maham hadien ba la ïoh jingtip ba ki don kiba die beaiñ ïa ki kynja jingpynbthei ban lehkmen Diwali bad la mana tyngeh ban pynbthei ïa ki bom pataka na bynta ka jingrakhe Diwali ha ki jaka ha ka jingjngai kumba 100 mitar na ki jaka kiba dei ban long jar-jar kum ki jaka sumar, jaka pule, jaka ba don ki ïingkashari, jaka mane bad kiwei pat ki jaka kiba la pynbna kum ki jaka ba dei ban long jar-jar (silence zones).
Ha East Khasi Hills district, na ka liang ka Deputy Commissioner ka la pynmih ïa ka jingmana katkum ka kyndon 144 CrPC kaba la pynjari hadien ba la ïoh jingtip ba ka don ka jingdie beaiñ bad pynbthei bom pataka hapoh ka district.
La ong ba ka jingdie bad thied ïa ki bom pataka lah ban ïoh tang na ki dukan kiba la dep ban ithuh lyngba ka laisen katkum ka kyndon 84 jong ka Explosives Rules 2008 kaba mana haba ïadei bad ka jingbuh bad die ïa ki tiar pynmih ding ha ka por jong ka jingrakhe Diwali.
Shuh shuh la mana ruh ban wanrah ïa ki tiar pynmih ding kiba shna nabar ri bad la bthah ruh ba dei ban bud ryntih ïa ka hukum ba la pynmih da ka ïingbishar kaba halorduh (Supreme Court) ha kaba la shah ban die tang ki tarabatti bad tubri ki bym pynmih jingsawa ha ki jaka paidbah.
Kumta la shah ban pyndonkam kynja jingpynmeh ding bad jingpynbthei tang naduh 8 baje mynmiet haduh 10 baje mynmiet.
Na ka liang ki bor district ki la ong ba kine ki jingpynbthei ha ki jaka paidbah na ka bynta ka jingrakhe ki lah ban buh jingma pynban ïa ka jingim briew bad long ka jingpynwit ïa ki briew lada ym don kano-kano ka jingpyrkhing ban pynbthei.
