Aizawl, Naiwieng 10 (UNI)
Ka jingthep ‘vote’ biang ha kawei ka jaka thep ‘vote’ na bynta ka ilekshon sha ka ïingdorbar thaw aiñ ka Mizoram ka la ïaid beit ïaid ryntih ha kaba ka jingwan poi ki nongthep ‘vote’ ha ka Sngi Thohdieng ka long 87.08%.
Ka jingthep ‘vote’ biang ha ka Muallungthu Polling Station hapoh Aizawl South-3 konstitwensi ka la long kaba i donkam naba ki ophisar ki la kum klet ban pyndam ïa ka risol ‘Mock Poll’ na ki EVM bad kito ki la shah kynthup lang sha ka ‘vote’ ba dei hok.
Ki ophisar ki la ong ba 944 ngut (484 ngut ki kynthei bad 460 ngut ki shynrang) ki nongthep ‘vote’ na ki 1,084 ngut ki la ïashim bynta ha katei ka jingthep ‘vote’.
Dei tang kane ka jaka thep ‘vote’ hapoh ka Jylla ha kaba la pynlong biang ïa ka jingthep ‘vote’ hadien ba ka Jylla ka la leit sha ka ilekshon ha ka Sngi Ba-ar ban jied ïa ka ïingdorbar thawaiñ jong 40 ngut ki nongmihkhmat.
Ka jingthep ‘vote’ ka la i donkam hadien ba ki ‘Polling Official’ jong ka Muallungthu Polling Station ki la sngewthuh ba ki ‘vote’ kiba la thep ha ka ‘Mock Poll’ ha shuwa ba ka jingthep ‘vote’ kan sdang ha ka por 7 baje mynstep ha ka Sngi Ba-ar, ym shym la pyndam bad ba ki nongthep ‘vote’ ki la bteng ïa ka jingthep ‘vote’ jong ki ha kajuh ka kor EVM.
U Returning Officer jong katei ka Polling Station hadien ka jingïakren bad u nongpeit pyrman ilekshon, u la pynbna ïa katei sha ka Central Poll Panel bad ka ECI ka la hukum na bynta ban thep biang ïa ki ‘vote’.
Ha kajuh ka por, la thung da ki Polling Official bathymmai ban khmih bniah ïa katei ka jingthep ‘vote’.
Saw ngut ki kyrtong – Rosiamngheta na ka Congress, Prof. F. Lalnunmawia na ka Mizo National Front, Baryl Vanneihsangi na Zoram People’s Movement bad Rev. Zaichhawna Hlawndo, u kyrtong shimet ki long ki kyrtong kiba ïakhun na ka Aizawl South-III.
