Gaza, Naiwieng 10 (UNI)
Ka jingdon kiba ïap na ka thma Israel-Hamas kaba la sdang naduh ka 7 tarik Risaw bad haduh mynta ka la kiew sha palat 11,000 ngut ha Gaza Strip.
Ïa kane la pyntip da ka tnat ka koit ka khiah jong ka Palestine ha Gaza.
Haduh mynta, ka jingïap briew ka la kot sha ka 11,078 ngut, bad kine ki kynthup ïa 4,506 ngut ki khyllung khynnah, 3,027 ngut ki kynthei, 678 ngut ki tymmen ki kro katba ki don sa 27,490 ngut kiba mynsaw, la ong u Ashraf Al-Qaedra uba long u nongaiktien ka tnat ka koit ka khiah.
Nalorkata, u la ïathuh ba ka tnat ka la ïoh jingtip ba 2,700 ngut ki briew ki dang jah rngai hadien ka jingshah ban ha ka twa na ka jingkhyllem ki ïing ki sem. Na kine, 1,500 ngut ki dei ki khyllung khynnah.
Ha kajuh ka por, u la ong ba ka Israel ka la ther ïa 135 tylli ki shlem kiba dei jong ka tnat ka koit ka khiah, 21 tylli ki hospital bad 47 tylli ki Primary Health Centre bad kine kim lah shuh ban treikam. Ki la don ruh 198 ngut ki nongtrei ka koit ka khiah kiba la ïap bad 53 tylli ki kali kit nongpang ki la shah pynjulor.
U Ashraf u la pynpaw ba shen ki hospital ha Gaza kin ym lah shuh ban treikam namar ka jingduna ka umphniang ban pynïaid ïa ki.
