Nongpoh, Naiwieng 10
Ka Confederation of Ri Bhoi People (CoRP) ka la ai jingkyrshan pura ïa ki ASHA ha ka jylla kiba ïakhih ban dawa ïa la ka hok ban kyntiew ïa ka bai siew sngewbha (honorarium) kaba ju ai da ka Sorkar sha ki nalor kiwei kiwei ki jingdawa.
Haba kren sha ki lad pathai khubor, u Working President ka CoRP, u Bah Pateng Myrsing u la pynpaw ba kum ka seng ka dap da ka jingsngewkhia halor ka jingshah lehbeiñ ki nongtrei ASHA ha kane ka jylla kiba ju trei shitom wat ha ka jingsiew kaba rit eh, kata, tang T. 2,000 shibnai, katba ka kam kaba ki trei ka long kaba khia.
U la ong ba kumba ki nongtrei ASHA ha ka jylla ki don hapdeng ka jingïakhih da kaba sangeh treikam ban dawa ïa la ka hok, ka seng ka ai jingkyrshan pura ïa ki bad lada dei ban mih sha surok ruh, yn mih lang shakhmat ban pynïoh ïa ka hok jong ki nongtrei ASHA.
Dang shen ka Myntri ka tnat ka koit ka khiah, ka Kong Ampareen Lyngdoh ka la ong ba ka la dep ban ïakren bad ki nongtrei ASHA ha kaba la don ka jingïathir halor ki jingdawa jong ki, kiba kynthup ïa ka jingsumar ei kaba ym donkam ban siew pisa, ka jingthung kam bad ka jingweng kam ïa ki nongtrei ASHA kiba trei mon sngewbha.
Halor ka jingong ba ki nongtrei ASHA ym ïoh jingsiew ha ki por ba la dep, ka Myntri ka la ong ba ka Sorkar MDA-1 ka la peit bniah bad ka la lah ban ai ïa ki jingsiew kiba sah jong ki nongtrei ASHA.
Ka Myntri ka la ïathuh ruh ba ha ka jingïasyllok jong ka bad ka tnat ka koit ka khiah ha ryngkat u Myntri Rangbah, u Conrad K Sangma, la ïoh jingtip ba katkum ka aiñ, ki briew kiba trei mon sngewbha kin ïoh ban trei haduh 2 snem, bad ynda la kut ka samoi treikam, yn hap ban ailad sa ïa kiwei pat ban shimti ïa ka kam, ym ban ïohlad ban trei da kijuh shi kijuh ki briew.
Kumta ka la kyntu ruh ïa ki Dorbar Shnong ban ïatreilang bad ka Sorkar, namar ka don ïa ka iktiar ban shimti ïa ka kam.
Ka la ong ba ka Sorkar kan sa pynkhlaiñ ïa ki jinghikai sha ki Dorbar Shnong, bad ban ailad ïa ki Nos, bad kiwei de kiba don ïa ka jingnang jingtip shaphang ka pule puthi kaba ïadei bad ka koit ka khiah ba kin don bynta lang ban ai jingsumar ïa ki briew kiba shitom ha ki shnong ki thaw.
Ha kajuh ka por, ka Kong Ampareen ka la kyntu ruh ïa ki nongtrei ASHA ba ki dei ban don ka jingïatreilang bad ban burom lang ïa ki Dorbar Shnong khnang ban kiew ka koit ka khiah ha ka Jylla.
Shuh shuh, ka la khot bad wer biang ïa ki nongtrei ASHA ba kin wanphai biang sha ka kam kaba ki trei mon sngewbha, da kaba bynrap ruh ba ym pat lah ban ai kano-kano ka jingkular sha ki nongtrei ASHA, hynrei kim dei ban ieh ïa ka kam kaba ki trei shiteng por.
