Nongpoh, Naiwieng 12
Ar ngut ki rangbah briew ki la duh noh la ka jingim hadien ka jingshah bat bording ilektrik ha ka shnong Kpepsyiem, Ri-Bhoi District.
Katkum ka khubor ba la ïoh lum, la ong ba katei ka jingjia ka dei kaba la jia ha ka shiteng miet jong ka Sngi Saitjaiñ bad ïa ka met jong kitei 2 ngut ki rangbah kiba dei na ka shnong Umden La-ang, kiba la tip kyrteng kum u Lal Lapang (64 snem ka rta) bad u Pian Namsaw (44 snem ka rta) la lap da ki paidbah ha step jong ka Sngi U Blei ha ka por kumba 8:30 baje mynstep.
Na ka liang ki bor pulit hadien ka jingïoh jingtip halor katei ka jingjia, ki la leit ban shimti noh ïa ka met bad rah sha Byrnihat CHC bad ïa ka ‘Post Mortem’ la pyllait noh hadien ka jingkyrpad ki bahaïing hasem jong kitei 2 ngut ki rangbah kiba la khlad.
