Shillong, Naiwieng 12
Palat lak ngut ki paid ‘riewngeit ka Balang Katholik ki la ïashim bynta ha ka Proseshon Eucharist ba shisien shisnem kaba la long ha ka Sngi U Blei.
U Apostolic Nuncio ka India bad Nepal, u Most Rev. Leoparddo Girelli haba pynsngew ïa ka khubor jong u sha ki paid ‘riewngeit kiba la lum lang ha Lum Tyngkong, Laitumkhrah u la pynpaw ka jingsngewkmen ba u la ïoh lad ban ïashim bynta ha ka Proseshon Eucharist jong ka Shillong Archdiocese ban ïasam lem ïa ka jingieid bad ka jingriewblei ha ka Eucharist Bakhuid.
Ha kajuh ka por, u la ong ba ka ‘Eucharist’ ka dei ka pdeng bad ka tyllong jong ka jingngeit Katholik.
“Ka Proseshon Eucharist ka long ban mane, ban rwai, ban ïaroh bad ainguh ïa u Blei bad uba la aiti ïalade ha ngi lyngba ka Met bad ka Snam. Ka ‘Eucharist’ ka dei ka jingaiei jong u Trai Jisu Khrist kaba da lade hi u pynpaw ha ngi ïa ka jingieid ba khlem pud jong U Blei ïa ki briew,” ong u Archbishop Girelli.
U la ong ba ka jingïaid Proseshon ka pynkynmaw ïa ka jingïaid lynti jong ki briew ha kane ka sla pyrthei bad u Jisu uba la ïaid ryngkat lang bad ki.
“U long u paralok, u nongïalam lynti, u Kpu uba pynkdang ha ka jingïaid lynti jong ngi sha ka jingim bymjukut. Kum ki Khristan ngi donkam ïa u Khrist ba un don ha ka jingim jong ngi,” ong u Archbishop Girelli bad bynrap ba ka Balang ka ïoh jingim lyngba ka ‘Eucharist’.
U la ong ruh ba ka Vatican Council ka pynbna ba ka ‘Eucharist’ ka dei ka tyllong jong ka jingim Khristan.
Na ka liang u Most Rev. Ferdinand Dkhar, Bishop ka Jylla Niam Jowai, ha ka jingkren jong u, u la sneng bad kraw ïa ki ‘riewngeit da kaba pynkynmaw ba ka jingwan ïuhkjat jong u Apostolic Nuncio uba long u nongmihkhmat jong u Pope Francis, ka jingïadon lang jong u Auxilliary Bishop ka Aizawl, u Most Rev. Joachim Walder bad ki ‘riewngeit na kylleng ka Jylla bad wat shabar ri ka pynpaw shai ba ka Balang Katholik ka long kawei bad ka phaikhmat sha u Jisu kum u nongsharai ba hakhlieh tam kum ka tynrai bad ka tyllong jong ka jingieid.
U Apostolic Nuncio, Archbishop Leopoldo Girelli u la pynmynta ruh ïa ka Mass Bakhuid ha ka por mynstep ha ryngkat ka jingdonlang u Archbishop ka Jylla Niambah Shillong, u Most Rev. Victor Lyngdoh, u Bishop ka Jylla Niam Nongstoiñ, u Most Rev. Willbert Marweiñ, u Bishop ka Jylla Niam Jowai, u Most Rev. Ferdinand Dkhar, u Auxiliary Bishop ka Aizawl, u Most Rev. Joachim Walder, ki Lyngdoh Sohblei lem bad ki lak ngut ki paid ‘riewngeit na ki lai tylli ki Diocese.
Ha kane ka sngi, ka Balang ka la ïoh ban pynkup burom ruh ïa ki 3 ngut ki Lyngdoh Sad kiba la ïashim bynta lang ha ka jingkñia ïa ka Mass Bakhuid katba ka Editorial Board Ka Ïing Khristan (EBIK) ka la pynkup burom da ka khusnam ‘Ka Ïing Khristan Literary Award’ na bynta u snem 2023 ïa u Bah Apol Mawñiuh hadien ba ka kynhun ki nongbishar ki la ibit ïa ka jingthoh jong u halor ka phang “Ka jingieid shi kurim ka thymmei jong ka ïing ka sem basuk” kum ka jingthoh kaba kynsai tam jong u snem 2023.
Ïa ka Proseshon Eucharist mynta u snem la pynkut da ka jingkyrkhu jong u Apostolic Nuncio ïa ki paid u Blei da ka Eucharist Bakhuid ha shuwa ban pynkut ïa ka jingmane ïa ka Sakramen Bakhuid tam ka Duwan.
