Shillong, Naiwieng 12
U MLA ka UDP uba mihkhmat ïa ka Mawkyrwat konstitwensi, Bah Renikton Lyngdoh u la pynpaw ba ka shong ha ka seng United Democratic Party la kan ai tiket ne em ïa u Bah Robertjune Kharjahrin ba un ïakhun ïa ka ilekshon MP Lok Sabha hadien ba u la rung dkhot pura sha ka UDP Mawkyrwat Circle.
U Bah Robertjune Kharjahrin u la shongthait pura na ka seng Hynñiewtrep Youths’ Council (HYC) myn ha ka 11 tarik Naiwieng 2023 hadien ba la dep pynbam smai ïa u President bathymmai ka HYC Sengkmie Bah Roykupar Synrem ryngkat ki dkhot ka CEC kaba la long ha Dorbar Hall Jaïaw Shyiap bad Lumpyllon.
U Bah Robertjune Kharjahrin u la dei ban shim smai kum u Chief Adviser ka HYC hadien ba u la iehnoh ïa ka kam President ban aiti ha u Bah Roykupar Synrem, hynrei namar ba u la don jingthmu ban rung noh sha ka kam saiñpyrthei um shym la treh shuh ban bamsmai ïa kane ka kam bad rai ban shongthait noh na ka seng.
Ha kane kajuh ka sngi u Bah Robertjune u la leit ban pynïasoh pura sha ka UDP Mawkyrwat circle ïa kaba la pdiang burom da u Bah Renikton Lyngdoh uba dei u MLA ka thaiñ.
Haba ïakren bad u Bah Renikton u la pynpaw ka jingsngewkmen ba u samla uba ju ïa kit ïa bah ïa ka jaidbynriew lyngba ka seng HYC u la rung sha ka seng UDP kaba dang pynkhlaiñ ïa ka seng nangne shakhmat.
Halor ka jingthmu u Bah Robertjune ban pan tiket na ka UDP ha ka ilekshon MP, u Bah Renikton u la pynpaw ba kane ka jingthmu u la shu ïohi tang ha ka kot khubor hynrei kan sa paw shai ynda ka seng UDP ka la khot ïa ki kyrtong.
U la ïathuh ba ka UDP kan sa shong ïa ka Central Executive Committee (CEC) lashai ka sngi Nyngkong ban ïakren ïa ka ilekshon MP Lok Sabha.
Nalor kata, u la pyntip ruh ba lashai ka CEC kan sa thaw ïa ka Election Committee ban khot ïa kiba kwah ïakhun ïa ka ilekshon MP.
“Haba ïadei bad ki hynriew ngut kiba pynpaw ba ki kwah ban ïakhun ïa ka ilekshon MP, ngam kwah ban ong eiei namar ka mih tang ha kot khubor hynrei ngin sa shai ynda ka election committee ka la khot ïa ki kyrtong katno ngut ki ban aplai” u la ong.
Shuh shuh u la ïathuh biang ba ka UDP bad ka HSPDP ki la ïatreilang na ka bynta ban pynïeng lang ïa uwei u kyrtong ha ka ilekshon MP Lok Sabha. Kumta dei halor kane ka bynta ba ïa u kyrtong ban sa pynban yn hap ban ïakren lang bad ka HSPDP.
Namar kata, u don jingkyrmen ba u kyrtong ba ka UDP kan pynïeng un ïoh jingjop haba la ïatreilang bad ka HSPDP namar haduh mynta ki don 14 ngut ki MLA bad 8 ngut ki MDC.
Haba kylli la ka UDP kan khot ne em ïa ka seng VPP ba kan ïatreilang kumba ïatreilang bad ka HSPDP, u Bah Renikton u pynpaw ka jingsngewkmen ba lada ïatreilang bad ka VPP u kyrtong ba la pynïeng lang un ïoh ïa ka jingjop, hynrei u sngewthuh ba ka la eh ïa ka VPP ba kan ïatreilang namar ka la dep pynbna ïa u kyrtong jong ki.
