Shillong, Naiwieng 12
Ka Hynñiewtrep Youths’ Council- CEC (HYC-CEC) ka ai ka jingkyrshan ba pura ïa ka jingïakhih ka kynhun ki nongtrei ASHA bad kyntu ïa ka Sorkar ban pynbeit noh kloi ïa ka jingeh jong ki.
“Ka seng kam lah ban shu sngap bad long tang ki nongpeit ïa ka jingbym lah ka Sorkar ban pynbeit ïa ki jingeh bad jingdawa ba shong nongrim jong ki nongtrei ASHA ha kane ka Jylla,” ong u President ka HYC-CEC, Bah Roy Kupar Synrem ha ka kyrwoh khubor.
Ka seng ka dawa ba ka Sorkar ka dei ban thaw ki lad ki lynti ban pynurlong ïa ki jingdawa jong ki ASHA ban ïoh ka jingsiew kaba biang katkum ka kam ba ki trei, bad ban kynthup ïa ki hapoh ka MHIS na bynta ban ïoh jingsumar ei bad kiwei-kiwei ki jingdawa jong ki.
“Ngi pynpaw ka jingkyrshan kaba pura ïa ka MAWU halor ka jingïakhih jong ki bad ngim lah ruh khlem da ai khublei bad sngewnguh ïa ki ASHA halor ka jingtrei len lade jong ki ha ki jylli treikam kaba ki don khamtam eh ngim dei ban klet kumno ba ki len lade ha ka por ba ngi mad ia ka Khlam COVID-19. Dei ma ki kiba long kita ki nongtur ba hakhmat ban ïakhun pyrshah ïa kane ka khlam,” ong u Bah Synrem.
“Kumta, kum ki nongshong shnong ngi sngew dap ram ïa ka jingshakri ba len lade jong ki bad lyngba kane ka kyrwoh, ngi khot ngi wer ïa baroh ki dkhot ka Jaidbynriew, ki Dorbar Shnong bad kiwei-kiwei ba kin kyrshan ïa ki ASHA ha kane ka jingïakhih jong ki,” ong utei u nongïalam.
Shuh shuh ka seng ka kyntu ïa ka Sorkar ba kan pynbeit noh kloi ïa katei ka kam namar lada ki ASHA ki bteng ka jingïakhih, kan ktah ïa ki paidbah nongshong shnong ka Jylla.
“Ngi kyntu ruh ïa ka Sorkar ba kam dei ban pyntieng pynsmiej ïa ki nongtrei ASHA ba kin shah weng kam lada kim sangeh ka jingïakhih namar lada ka Sorkar ka bakla ban shim rai bad weng kam ïa ki ASHA kiba ïakhih ban dawa ïa la ka hok, na ka liang ka Seng ruh kam banse ban mih shakhmat bad ïakhih pyrshah ïa ka Sorkar Jylla,” ong utei u nongïalam.
