Shillong, Naiwieng 12
Khnang ban pynïaid shakhmat ïa ka jingthmu ban kham pynkylluid ïa ki surok, ka Sorkar Jylla ka la nang pynkhreh ïa ka jaka ha Umshyrpi ban tei ïa ka surok kaba ïaid kali nalor lane ‘flyover’.
Katkum ka jingpynkhreh ka Sorkar, la ong ba ka jingtei ïa ka surok ban ïaid kali nalor kan dei naduh Umshyrpi shaduh ka petrol um ha Anjalee bad lada dang ïoh jaka shuh shuh, yn bteng shaduh Rhino. Ha Rhino, baroh arliang surok la ker da ki jaka kiba la bat da ki shipai.
Ka jingkhapngiah ka surok ynda la poi ha thaiñ Umshyrpi ka dei kaba jur bha man ka sngi ha kaba ki kali kiba wan na kiwei ki district sha Shillong kum na West Khasi Hills, South West Khasi Hills, Eastern West Khasi Hills, bad na thaiñ Sohra, bad Pynursla.
Man la ka sngi ki kali, ka dheng kali ka la don lypa ki hap ban ïa tyngngian ynda poi ha jingkieng Umshyrpi ter ter shaduh petrol pum ha Anjalee, Rhino, Civil Hospital bad kiwei kiwei ki jaka ha sor.
Ki paidbah ka nongbah Shillong ki la khmih lynti la bun phew snem ban don ki surok kiba ïaid nalor lane flyover kumba long lem ha kiwei ki nongbah. Hynrei kam shym la urlong ha kine ki phew snem kiba la leit.
Lehse kin sa ïohi ïa ka ‘Flyover’ kaba nyngkong eh ha nongbah Shillong ha ki khyndiat snem ban wan, lada ki kam ki ïaid beit ka Sorkar ka la pynkhreh ïa ka jingpynwandur ban tei ïa kane ka surok kaba ïaid nalor na Umshyrpi sha Rhino Museum.
Khyndiat bnai mynshwa, u Myntri Rangbah u Conrad K Sangma haba jubab ïa ka jingkylli la ka Sorkar ka dang lah ne em ban tei flyover ha nongbah Shillong hapdeng ka jingbym ïoh jaka bad jingkhapngiah kaba shyrkhei, u la ong ba ka jingtei ïa ka flyover ka dang don ka lad ha Shillong bad yn sdang nyngkong eh na Umshyrpi.
U la ong ba lada dang long, yn pynjrong shuh shuh ïa ka Flyover lada dang ïoh jaka yn sa nang pynjrong shuh shuh sha kiwei kiwei ki bynta kiba dang lah ban leh.
Hapdeng ka jingkhapngiah kaba jur, ka jingthmu ka Sorkar ban wanrah ïa ki projek ban pynduna ïa ka dheng kali ka long kaba dei eh, hynrei ka jingkylli ka long, lano yn urlong kloi ki projek kum ka flyover, skywalk bad kiwei kiwei ki projek kiba lah shisha ban pynduna ka jingkhapngiah ha nongbah Shillong.
