Dehradun, Naiwieng 12 (UNI)
Kumba 40 ngut ki nongbylla ki la sahkut shapoh hadien ba ka la don ka jingtwa ha kawei ka Tunnel kaba dang shna bad kaba jrong kumba 4.5 km hapdeng ka Silkyara bad Dandalgaon ha surokbah Brahmakhal-Yamunotri kaba hap ha Uttarkashi ka jylla Uttarakhand ha ka Sngi U Blei.
Khnang ba kitei kiba sahkut kin ym shem shitom ban ring mynsiem, ki bor ba dei khmih ki la pynrung da ka lyer ‘Oxygen’ lyngba ki ‘pipe’ um kiba don hapoh jong katei ka Tunnel.
U District Magistrate ka Uttarkashi, u Abhishek Ruhela, u la ong ba ka jingtrei ban ïoh pyllait ïa kitei ki nongbylla ka dang ïaid kynthup ïa ka jingpynkhuid ïa ka twa.
U la ong ba ka kam ba hakhmat duh na ka bynta ki bor distrik ka long ban ïoh pyllait im ïa kitei ki 40 ngut kiba la sahkut shapoh.
U Ruhela u la ïathuh ba ka kam ban pyllait ïa kitei ki briew la leh da ki bor distrik ha ka jingïatreilang bad ki tnat bapher-bapher bad ka NHIDCL.
Na ka liang ki bor distrik ki la pynmih paidbah ïa ki kyrteng jong kitei ki 40 ngut ki briew kiba dei na ki jylla bapher-bapher.
