Mawkyrwat, Naiwieng 12
Ka United Democratic Party ( UDP) Mawkyrwat Circle da ka mynsiem jong ka jingkmen ha ka janmiet jong ka 11 tarik Naiwieng 2023 ka la ïoh ban pdiang burom ïa u Bah Robertjune Kharjahrin sha ka seng UDP hadien ba u la shongthait noh na ka kam President jong ka seng HYC.
Ha katei ka sngi la pdiang burom ïa u Bah Robertjune Kharjahrin ha shlem treikam ka UDP, Mawkyrwat da u Bah Renikton Lyngdoh Tongkhar, MLA ka Mawkyrwat ha ryngkat ka jingdonlang u President, ki nongkitkam ka seng naduh ki Rangbah, ki samla bad ki longkmie.
Kumban shu kdew hangne, u Bah Robertjune Kharjahrin u dei u President ka HYC bad uba dang shongthait na ka kam President ha kaba ka seng HYC myn ha ka Sngi Saitjaiñ ka la ïoh ruh ban leh burom khatduh ïa u ha Community Hall, ha Jaïaw Lumpyllon.
U Bah Robertjune Kharjahrin haba ai jingkren sha ki lad pathai khubor u la pynpaw ïa ka jingaikhublei ïa ki nongïalam ka UDP Mawkyrwat Circle lem ïa u Bah Renikton Lyngdoh kiba la pdiang sngewbha ïa u sha ka seng bad pynpaw ruh ba um dei shuh u khmat thymmai ha ka UDP – u thymmai tang ha kaba paw, hynrei ha ka jingkyrshan, ka ïing ka sem jong u ka la dei lypa ka ïing ka sem kaba kyrshan UDP naduh ki kmie ki kpa jong u.
U la pynpaw ruh ba kaba pynlong ïa u ban leit pynïasoh sha ka UDP ka dei tang kawei ka daw, namar haba ïanujor bad ki mat ki jura bad ki nongrim jong ka UDP, kam da ïapher than bad ki nongrim ki sengbhalang.
“Kam don jingpynkhohñioh ban ong mynshwa nga dawa ILP, pynbeit ïa u pud u sam, mynta nga dang long ne em ban dawa, kam don kum kata namar ha ka ‘manifesto’ jong ka UDP ka ong hi kumjuh ba kan ïeng ban ïada ban pynneh pynsah ïa ka riti-dustur bad ban kyntiew ïa ki trai-ri trai-muluk,” u la ong.
U Bah Robertjune Kharjahrin u la pynpaw ruh ïa ka jingthrang ban ïakhun ïa ka MP ilekshon sha ka Lok Sabha da kaba pynpaw ba ka thong hi ka dei kumjuh hynrei ka pher tang ha ka lynti ha ka por ba dang don ha ka sengbhalang.
Shuh shuh u la pynpaw ba lada ki paidbah ki ai ïa ka jingkyrshan bad lyngba ka mon jong u Blei Nongbuh Nongthaw u ibit un leit ban ïasaid hi dalade ha Parliament ban dawa ïa ka ILP, pynbeit u pud u sam bad khamtam ban pynurlong ïa ki jingthrang u Maieid Hoping ban pynbeit ïa ka Khyrnit ba 6 bad kiwei-kiwei.
