Shillong, Naiwieng 12
Ka jingbym wanphai ïing shuh u Bah Justine Sohphoh, 54 snem ka rta, uba dei u nongñiah kali ha Meghalaya Public Service Commission (MPSC) kaba la ïaid mynta lajan ar bnai pura ka la pynlong ïa ki bahaïing hasem ba kin hap ban pynlong da ka jingduwai ban pyneh daw ïa ka ïing ka sem.
Kum ban shu pynkynmaw, u Bah Justin Sohphoh u la jah na la ïing ha ka 16 tarik u Nailur 2023 ha ka por ba u mih na ïing ban leit theh umphniang uba la ñiah da ka kali i20. Kat haduh mynta ym shym la lapdien shuh wat la ki bahaïing hasem ki la dep ujor da ka ejahar sha ki pulit.
Haba ïakren bad u Bah Poland Sohphoh uba dei u Rangbah Kur Sohphoh, u la ïathuh ba ka ïing ka sem mynta ka la pynkhreh ban pynlong ka jingduwai phirat ban eh daw ïa ka iing ka sem namar hadien ba la wad jingtip ki don kiba kham hashwa kiba la jah na ka jait Sohphoh.
Kumta u la ong khnang ban nym hiar pateng shuh hadien habun ban nym jia shuh ïa ka jingjah briew, ka ïing ka hap ban pynkhreh ban duwai.
U la ïathuh ba kato ka jingbatai u nongduwai na Bhoi ba u Bah Justin u dang ïaid wir haduh mynta kam shym la urlong namar haduh mynta la ar bnai u khlem wanphai ïing shuh.
Haduh mynta ngin nym pat leh niam leh rukom namar ngim lah ban pynshisha la u dang im ne u la ïap hynrei lada um wanphai shuh ngin shu pynlong tang ka jingduwai ban eh daw.
U la ïathuh ba ka ïing ka sem ka la leit wad jingïarap na ki pulit shaduh Assam hynrei ym shym la lapdien shuh.
U la ong ba ka kmie kaba don sha Sakwang, South West Khasi Hills District haduh mynta ka dang sah ha ka umdum haba u khun um shym la wanphai ïing shuh.
