Shillong, Naiwieng 12
U President ba dang shu shimti ïa ka Hynñiewtrep Youths’ Council (HYC) Bah Roykupar Synrem u la ong ba ka seng hadien ba ka la ïoh ïa ki nongkitkam kiba thymmai kan buddien ïa ka aiñ Meghalaya Resident Safe & Security Act (MRSSA) 20016 kaba ka Sorkar India ka la pynphai biang sha ka Sorkar Jylla.
Ïa kine ki kyntien u Bah Roykupar u kren hadien ba u la shah pynbam smai kum u President ka HYC kaba la long ha ka 11 tarik mynta u bnai ha Dorbar Hall Jaïaw shyiap bad Lumpyllon.
U Bah Roykupar u la ong ba ka Sorkar Jylla ka la mynjur ïa ka MRSSA ha u snem 2016, hynrei ka seng ka ai jingmut biang ba dei ban pynkhlaiñ ïa kane ka aiñ namar ka shu pynrung kyrteng ïa ki bar jylla haba ki wan shapoh ka jylla.
U la ïathuh ba ha ka jingbuddien ka seng, ka Sorkar Jylla ka la wanrah ïa ka jingpynkylla da kaba buh ki kyndon kiba pyrkhing ïa ki bar jylla haba ki wan shapoh ka jylla da kaba wanrah biang ha ïingdorbar ha u snem 2020.
“Ngi ïohi ha kine ki sngi ba ka Sorkar India lyngba ka Ministry of Home Affairs ka la pynphai biang ïa kane ka aiñ sha ka Sorkar Jylla, hynrei ka HYC kan buddien ïa kane ka aiñ khnang ban ïada ïa ka jaidbynriew” u la ong.
U Bah Roykupar u la ong ba ka jaidbynriew ka dang donkam shuh shuh ki aiñ ban ïada naduh ki aiñ kiba la don lypa bad ki aiñ ban dang shna thymmai namar kum ka ïadie ïathied jaka, nangta ka jingkhaïi benami kaba la pynjot ïa ka jaidbynriew.
Kumta u la kyntu ïa ki paradoh ba kin kiar ïa kane ka kam leh benami namar ka jingmyntoi ïa kiwei ki jaidbynriew.
U la ong ba ILP ka dei ka jingdawa kaba ka sorkar ka la mynjur ha ïingdorbar hynrei ka jingïakhun kan long ïa ka Sorkar India.
Katba u Bah Peter J Lawai uba dei u President ba nyngkong ka HYC uba la pynbam smai ïa ki nongkitkam kiba thymmai, u la kyntu ba ki nongïalam kim dei ban shu hukum ïa ki dkhot ne ba kiwei ki dei ban leh beit katba ong ma ki hynrei ki dei ban sdang bad leh shwa dalade.
Hashwa ban sdang ka jingïalang ha Dorbar Hall Jaïaw Shyiap bad Lumpyllon la pynlong ka jingduwai da u Phadar Richard Majaw, la ïoh ïa ka jingrwai na u Khrawbok Blah bad kynhun Summersalt Band ha ka jingïadonlang ki ar ngut ki MLA, kata ka Kong Ampareen Lyngdoh kaba dei ka Myntri Sorkar Jylla, u Bah Adelbert Nongrum uba dei u MLA ka North Shillong constituency ha ka jingïadonlang ki dkhot ka HYC, ki bahaïing hasem lem bad kiba shah khot sngewbha.
