Shillong, Naiwieng:
Ka Amazon India ka la nang pynïar shuh shuh ïa ka jingïalap paidbah jong ka na ka bynta ki nongthied, lyngba ka Mission GraHAQ, na ka bynta ki jylla jong ka thaiñ Shatei -lam-Mihngi, kum shi bynta ban hikai bad pynkupbor ïa ki nongthied shaphang ka thied jingthied na ki ïew online bad ïarap ban wanrah ïa ka jingshaniah bad ka jingshngaiñ ïa ki nongthied jingthied lyngba ka ïew Digital. Ka Amazon ka thmu ban pyndonkam ïa ka radio kum shi bynta jong ka Mission GraHAQ, kaba thmu ban ïalap paidbah na ka bynta ki nongshong shnong ka Shillong bad pynlong ïa ki, ki nongthied kiba sngewthuh shaphang kane.
Ka Amazon ka thmu ban pyllait ïa ka prokram jingïakren lyngba ka All India Radio na ki 29 tylli ki Radio Station ka thaiñ Shatei-lam-Mihngi ha kaba yn pyllait ïa kine ha ki khyndai tylli ki ktien ba ju kren bha da ki nongshnong shnong jong ka thaiñ, bad ka jingthmu ka long ban ai jinghikai ïa ki nongthied shaphang ka jingshngaiñ jong ka thied jingthied lyngba ka Online bad ïada ïa ki na ka jingshah thok shah shukor, ïa kane yn pyllait ha Arunachal Pradesh, Assam, Manipur, Meghalaya, Mizoram, Nagaland, Sikkim, bad Tripura. U Conrad Kongkal Sangma, u Myntri Rangbah ka jylla Meghalaya, u ong “Namar ba ka thaiñ jong ngi ka kiew sted bha, ka jingai jingshngaiñ ia ki nongthied ka long kaba donkam khnang ba kin thied jingthied na ki rynsan Digital. Kane ka sienjam treikam kan ïarap ban pyntikna ïa ki ba ki nongthied ki long kiba sngewthuh bha bad kiba ïoh ïa ka jingïada.” Shuh shuh la bynrap ïa kata da u Chetan Krishnaswamy, Vice President jong ka Public Policy ha Amazon India, da kaba ong “Ka rukom thied jingthied jong ki briew ha ka thaiñ thaiñ Shatei-Mihngi na ka Online ka la sted bha, bad ka jingkhublei baroh ka long namar ba ki la lah ban jied na shibun kiei kiei bad ka long kaba suk bha, bad ngi kwah ban pynsaphriang ïa kane ka khubor sha kiba bun da kaba shim kabu ïa ka All India Radio kaba lah ban saphriang sha kylleng.”
Ha ka snem 2022, ka Amazon ka la pyllait ïa ka jingïalap paidbah kaba la saphriang sha ki Million ngut ki nongthied jingthied ha ki 100 tylli tam ki nongbah ha ki hynriew tylli ki jylla, da kaba kyntiew ïa ka jingshaniah jong ki briew ïa ka rukom thied jingthied lyngba ka online bad ïa kane la leh lyngba ki 400 tylli ki jingïalehkai lyngkot ba la pynlong ha surok bad ka jingpyllait ïa ki byrta ki shula na Radio man la ka taïew ha kaba ïadei bad ka hok ki nongthied, ki jingjied jong ki bad ka jinglah ban pynbeit ïa ki jingeh kiba ki ïakynduh.
