Shillong, Naiwieng 12
Ka Don Bosco Technical School Shillong ka dei kawei na ki shlem ai jinghikai pyntbit ïa ki samla kaba la paw bha ha kane ka jylla Meghalaya. Kane ka shlem ka dei kaba la btin lynti ïa kiba bun ki briew ba kin lah ym tang ban ïoh kam ïoh jam bad ban kyrshan ïa ka ïing ka sem, hynrei ba kin lah ruh ban seng kam seng jam bad ai kam lem ïa kiwei.
Ka Don Bosco Technical School Shillong ka la ïaid lynti la 100 snem ha ka jingshakri ban ai jinghikai pyntbit ïa ki samla ha ki kam bapher bapher naduh ban long ki nongshna kali, ki misteri dieng, ki kam kiba ïadei bad ka bording ilektrik nalor kiwei kiwei ki kam kiba lah ban ai khaw ai ja lyngba ki jinghikai pyntbit kiba ki la ïoh na Don Bosco Technical School.
Kane ka jaka ai jinghikai pyntbit ka dei kaba la peit la khmih bad pynïaid da ki riewniam ka Balang Katholik kiba dei na ka jingïasyllok Salesians of Don Bosco (SDB) bad lah ban ong ba ka la long shisha ka jingmyntoi ïa ki phew hajar bad ki lak ngut ki briew kiba la leit ban shah hikai pyntbit ha ki kam bapher bapher.
Mynta u snem 2023, ka Don Bosco Technical School ka rakhe ïa ka jingdap 100 snem naduh ba la sdang ïa ka ha u snem 1923. Ha kine ki 100 snem, kane ka shlem ai jinghikai ka don bun ngut ki briew kiba don la ki jong ki jong ki sap ki phong bad ki buit kiba kham kyrpang kiba ki lah ban leh da kaba pyndonkam lang ïa ki jinghikai pyntbit kiba ki la ïoh.
Kaba kham kyrpang ha kane ka jingdap 100 ka Don Bosco Technical School, ka dei ka jingpynwandur bad shna ïa ki kali da ki nonghikai bad ki samla kiba la pyndep ïa ka jingshah hikai na Don Bosco Technical School.
Kine ki kali ki dei ka e-bike bad e-wheelchair kiba pyndonkam da ka battery ba la pynwandur bad shna da ki lai ngut ki nonghikai bad uwei u samla uba la shah hikai ban shna kali uba la trei lang ha Don Bosco Technical School, Shillong.
Kine ki nonghikai lane instructor kiba don ha lyndet ban pyntreikam ïa ki buit ban shna ïa ka e-bike bad e-wheelchair, ki long u Bah Dominic Ïawphniaw, Shemphang Nongkynrih bad Mario Gareth Sawkmie, katba u Technician uba don bynta ban shna u dei u samla Martin Syngkli. Kane ka la wan ruh lyngba ka jingai jingmut jong u Principal ka Don Bosco Technical School, u Fr Arcadius Puweiñ.
Ïa kine ki kali la pyni nam ruh ha ka Expo kaba lai sngi jong ka Don Bosco Technical School kaba la pynlong naduh 9 tarik haduh 11 tarik Naiwieng bad ïa kane ka Expo la wan ban plie da ka Myntri Sorkar ka Kong Ampareen Lyngdoh.
Ha kane ka Expo la pyni nam bad die ruh bun ki tiar ki tar kiba la shna hi da ki nongtrei ka Don Bosco Technical School bad ki samla kiba la shah hikai.
Ym tang ki e-bike bad e-wheelchair, ki samla kiba la pyndep ïa ka jingshah hikai pyntbit na Don Bosco Technical School ki la shna pynwandur ruh ïa ka top buh umphniang ha ka dur jong ka kali bad ïa kane ka kali la pyndait da ka mashin generator ba kan lah ban ïaid. Ïa kane ka kali la ai da ka kyrteng ’29’ namar ki don 29 ngut kiba donbynta lang ban ai buit kumno ban shna ïa kane ka kali.
Ki paidbah kiba wan sha Don Bosco Technical School ban peit ïa ki jingpyni nam ïa ki tiar ki tar bad ki jingshna ba kham pher ki la ïap biej ïa kine ki kali kiba la shna hi da ki nonghikai bad ki samla kane ka shlem ai jinghikai bad kaba kham khring shuh shuh ka dei ka Jeep kaba la shna da uwei u samla donsap uba la pyndep ruh ïa ka jingshah hikai na Don Bosco Technical School, Shillong. Ïa kane ka Jeep la ai kyrteng da ka Kharbudnah Jeep kaba la shna une u samla uba dei na thaiñ Mawhati Ri Bhoi District.
Na ka liang u Principal ka Don Bosco Technical School, Shillong u Fr Arcadius Puweiñ, u la ai ka jingïaroh ïa kane ka shlem ai jinghikai kaba la ai ka jingshakri mynta la 100 snem ha ki kam bapher bapher ban ai jinghikai pyntbit ïa ki samla.
U Fr Arcadius u la ong ba ka Don Bosco Technical School ka dei ka jaka ai jinghikai kaba la sdang naduh u snem 1923 bad ka thong hi ka long ban ban plielad ïa ki samla lyngba ki jinghikai pyntbit kiba bun rukom khamtam kumba la maitphang da u Don Bosco bakhuid uba long u nongïarap jong ki samla.
U Fr Arcadius u la ïathuh ba ka Don Bosco Technical School Shillong ka la lah ban pynmih kumba 5000 ngut ki samla kiba shah hikai pyntbit ha ki kam bapher bapher man la u snem khamtam ha kine ki khyndiat snem ba la bun ki samla kiba kwah ban wan shah hikai, ym kum ha ki snem kiba mynshwa ba dang kham duna kiba wan shah hikai.
Ha kawei pat ka liang, u Fr Arcadius u la batai khyndiat shaphang ki buit kiba u la ai jingmut lang ha ryngkat bad ki nonghikai ban shna ïa ka e-bike bad e-wheelchair khamtam namar kane ka juk ka dei kaba hap ban pyrkhat na ka bynta ka jingbha ka mei mariang.
Ha kaba pynkut ïa ka jingïakren, u Fr Arcadius kum u Principal ka Don Bosco Technical School Shillong, u la phah ka khubor ban kyntu kynpham ïa ki samla ban pyndonkam hok ïa ki jinghikai pyntbit kiba ki la ïoh bad ban long kiba kloi ban trei kano-kano ka kam, bad ñiewkor ïa ki kam ba ki trei.
