Shillong, Naiwieng 12:
Wat la ka jingrakhe Diwali ka dei kaba ju rakhe da kiwei pat ki kynhun kiba leh katkum ka jingngeit niam jong ki, hynrei la sakhi ba ka jingthang bom pataka ka la jia ha ki shnong bad ki dong kiba bun tang ki paid Khasi.
Ym lah ban tip la kane ka jingpynbthei bom Diwali ha ki shnong ba shong ba sah da ki Khasi ka dei kaba ki leh da ka jingshongshit ne ba ki kwah ban ïasnoh lang ban rakhe Diwali lane ka jinglehkmen ïa ka jingshai.
Ïa kane ka jingpynbthei bom pataka la sakhi ruh wat ha ki shnong bad ki dong jong ka Mawlai ha kaba la ïohsngew ïa ka jingpynbthei bombula bad kiwei kiwei ki jingpynbthei kiba khlaiñ ka jingsawa.
Ha ki shnong ba sah khleh lang bad bun kiwei pat ki jaitbynriew kum ka thaiñ Laban, Pynthorumkhrah bad kiwei kiwei ki jaka ba khleh jaitbynriew, ka jingpynbthei bom pataka ka dei kaba kham don jingmut namar ki leh katkum ka jingrakhe jong ki ïa la ka jingngeit.
La sakhi ba ha ki ïing jong ki la pynriam itynnad da ki kynja jingpynthaba bad thang ruh ïa ki kynja bom ban pynbthei katkum ka jingngeit jong ki.
Ka Diwali ka dei ka jingrakhe ïa ka jingshai katkum ka jingngeit Hindu kaba mut ka jingjop jong ka jingshai ïa ka jingsumar, ka jingbha ïa ka jingsniew bad ka jingtip ïa ka jingsah biej.
Hynrei kaei kaba sakhi ha kum kane ka jingrakhe jong kiwei pat, la shu pyrthuh bad thang bom pataka khlem jingmut ha kine ki shnong ba sah da ki Khasi.
Wat ki khynnah ki shongshit ban pynbthei bombula bad jingpynbthei kiba pynmih ding ha surok bad lynti syngkien bad kane ka wanrah jingma bad jingpynwit ïa kiwei pat kiba ïaid lynti.
Ha ki snem ba la leit, ki don ki Dorbar Shnong kiba la pynmih ka jingmana ba ym bit ban pynbthei kulmar ïa ki bombula bad bom pataka ha shnong ha thaw khlem kano kano ka daw bad ka nongrim.
Na ka liang ki bor pynïaid district ruh ki la khang ban pynbthei kulmar ïa ki bom pataka ne kino kino ki tiar kiba pynmih jingsawa kiba long beaiñ namar ka ktah ïa kiwei pat.
Wat ïa kito kiba dei hok ban rakhe ïa ka Diwali la mana ba kim dei ban leh kulmar khamtam ban pynbthei bom palat ïa ka por kaba la buh.
La shah ban pynbthei tang hapdeng 8 baje mynmiet haduh 10 baje mynmiet.
Ka jingrakhe ïa ka Diwali mynta u snem ka hap ha Sngi U Blei ka 12 tarik Naiwieng, 2023.
