Shillong, Naiwieng 12
U MDC ka BJP na Tura, u Bernard N Marak, ha ka Sngi U Blei u la ong ba u nombor Aadhar um dei satia uta u ‘666’ lane uta u nombor jong u Soitan lane uta u ‘Anti-Christ’.
Ha u kyrwoh khubor, u Bernard u la ong ba u Aadhar u dei u nombor ba kyrpang kumba long u nombor Mobile, EPIC bad kiwei khnang ban lah ban ithuh ïa ki nongshong shnong. Ka dei ruh ka rukom ban pynbha ïa ka jingpynpoi ïa ki lad jingïarap sha ki nongshong shnong, bad u nombor Aadhar um don jingïadei eiei bad ka jingngeit, la ong u Bernard.
Nalorkata, u la kyntu ba ki paidbah kiba ïoh jingmyntoi na ki skhim sorkar ki dei ban pynïasoh ïa u nombor Aadhar bad ka ‘Bank Account’ jong ki khnang ban suk ka jingpynpoi ïa ka jingsiew.
Une u MDC u la ong ba ha ka jingshem ka jong u, kiba bun ki jingsiew ‘Online’ kim ïaid bha namar ki paidbah lehse ki khlem pat pynïasoh ïa kitei ki nombor – Aadhar bad ‘Bank Account’. Ka jingsiew hadien ba la pynïasoh ïa kine ki nombor kan weng ïa ki ‘riew shim kabu bad ïa ki kam bamsap bamngem kumba long ha ki por kiba mynshwa, u la bynrap.
U Bernard u la ong ba ïa ka pisa jong ki skhim na ka Sorkar Pdeng kum ka NREGA, PMAY, bai bam tymmen, bai bam na ka bynta ki samla pule bad kiwei la pynpoi beit ‘Online’ khnang ban wanrah ïa ka jingkhuid jingsuba ha ka jingsiew.
Hynrei u la kdew ba ha ka jingleit jurip jong u ïa ki shlem treikam ha ki Block, u la ïoh jingtip ba ki jaka kynshew pisa lane Bank ha kiba bun ki jaka ki khlem pat lah ban pynïasoh ïa u nombor Aadhar bad nombor ‘Bank Account’ jong ki paidbah.
Ki don lei ki jaka ba u la ïoh jingtip ba ki Bank ki la thang syndon ïa ki kot Aadhar ba la ai da ki paidbah ha ka jaka ban pyndep ïa ka jingpynïasoh bad ki ‘Bank Account’.
“Ki briew ki baduk kiba la dep ai ïa u nombor Aadhar sha ki Bank ki la ngeit ba la dep ban pynïasoh ïa u nombor Aadhar bad ka ‘Bank Account’ jong ki. Hynrei haduh mynta, ka jingpynïasoh kaba la pyndep ka long tang 50 na ka 100. Ha ka jingshisha, baroh ki Bank kin hap ban pyndep ïa ka kamram ban pynïasoh ïa kine ki nombor,” la ong u MDC ka BJP.
U la kyntu ruh ba kito ki nongshong shnong kiba khlem pat ïoh ïa ki jingsiew ki dei ban leit sha ki Bank ban pynthikna ba la dep ban pynïasoh ïa u nombor Aadhar jong ki bad u nombor ‘Bank Account’. U la ai jingmut ba ki nongshong shnong ki lah ban plie ‘Account’ ban buh pisa ha ki ïing dak (Post Office) da kaba pyndonkam da ka Aadhar Card lada ki Bank kim ai ïa ka jingïatreilang bad ki.
