Shillong, Naiwieng 12
Ka JAC-NEHU ha ka Sngi U Blei ka la kren shai ba ka jingïakren bad u Vice-Chancellor (VC) ka skulbah, Prof. S.K. Shukla ka lah ban urlong tang lada weng kam shuwa ïa u Technical Officer/Senior Consultant, u Rohit Prasad.
“Ka JAC ka kwah ban kynthoh jur halor ki jingkam ba lamler jong u VC haba ïadei bad ka thup jingdawa jong ka komiti kumba la paw ha ki lad pathai khubor. Um shym la pynbiang kino-kino ki jingpynshai sha ka JAC halor ki mat kiba la pynsngew ha ka jingïakynduh bad ki lad pathai khubor haba ïadei bad ka jingthung be-aiñ ïa u Technical Officer/Senior Consultant bad ki sienjam kiba la shim ban weng noh ïa u, ki jingpynkheiñ jong u, ïa ka Model UGC Cadre Recruitment Rules, NEHU Act, Statute bad Ordinance lem bad kiwei-kiwei ki jingpynkheiñ ne ban phah kano-kano ka jingthoh na bynta ban ïakren bad ka JAC,” ong ki nongïalam ka JAC ha ka kyrwoh khubor.
Ki la ong ruh ba wat hapdeng ka kynrum-kynram hapoh NEHU, ha jaka ban don hapoh skulbah, u VC u don pynban shabar bad muja ïa ka shuti jong u naduh ka 9 tarik haduh 15 tarik u Naiwieng.
“Kane ka kdew shai ïa ka jingbym shimkhia na ka liang jong u ban pynbeit noh mardor ïa kitei ki mat. Imat, u sngewtynnad ban lehkai bad ka lawei ki samla pule bad pynjaboh ïa ka jinglong-jingman ka jingpule hapoh ka skulbah,” ki la ong.
Haba pynrem jur halor ka jingong u VC ba ka JAC ka “pynlong ishu ïa ki bym dei ishu”, ki nongïalam ki la buh jingkylli ba hato ka jingthung be-aiñ ïa u Technical Officer/Senior Consultant kam dei mo ka mat ïakren – da kaba thung be-aiñ ïa u lyngba ka jingleh shiliang.
“Hato ka jingpynkheiñ ïa ka UGC Model CRR bad ka jingpynkheiñ ïa ka NEHU Act, Statute bad Ordinance kam dei ka mat ïakren? Dei ma u, u ban hap ïada ïa ki kyndon UGC bad NEHU hynrei dei ma u uba nyngkong ban pynkheiñ ïa ki la bun-bun sien,” ong ka JAC.
Haba buh jingkylli halor ka jingnang synjor ka jinglong-jingman ka University Health Centre, ka komiti ka la ong ba ka jingbym shimkhia bad jingbym sngewthuh jong u VC ba ïa ki dawai ym lah ban thied lyngba ka ‘Government e Marketplace’ (GeM), ka la ïalam sha ka jingwan poi slem jong ki dawai.
“Ka jingbym leh eiei jong u ban thung biang por ka la pynlong ïa ka jaka peit bniah ban khang khyrdep namar ka jingbym biang ki ‘Lab Technician’,” ong ki nongïalam.
Ka JAC ka la ong ruh ba haduh ka 5 baje janmiet jong ka 12 tarik mynta u bnai, ka NEHU Act, Statute bad Ordinance kim shym la don satia ha ‘website’ jong ka NEHU.
“Hato ka jingpynlong ïa ‘Convocation’ kam dei ka mat ïakren? Ka jingshisha ka long ba u VC u kwah ïa u X, Y, Z na Delhi, imat ki kynrad saiñ pyrthei jong u bad ka jingbym pyntikna jong ki, ka la ïalam sha ka jingpyndam ïa ki ‘Convocation’, kaba ktah ïa ki samla pule bad pynbna biang ïa ka jingbym don jingsngew jong u ïa ki samla pule bad ka NEHU hi baroh kawei,” ong ka JAC.
Hadien slem bah ba u la kyntait, ka JAC ka sngewkmen ban ïohi ba ha kaba khatduh, u VC u la sngewthuh ba ki nonghikai ki long ka bynta ba hakhmat eh jong ka Academic Council hadien ba ki la sdang ban ïakhih ha ryngkat ka jingïasnohktilang bad kiwei-kiwei kiba don bynta bad ka skulbah, ki nongtrei (bym hikai) lem bad ki samla pule.
Ka komiti ka la pyntikna ruh ba ka jingïakob tyrko nia kaba la khot ha shuwa da ka JAC ïa u VC ka dang neh.
“Shisien ba la weng kam ïa u Technical Officer/Senior Consultant uba la shah thung be-aiñ, ka JAC ka lah ban ïakren halor ki thup jingdawa da kaba buh jingmut ïa ka jingshimkhia bad ka jingdon mon na ka liang jong u ha ka ban pynbeit ïa kine ki mat ha ka por kaba biang,” ong ki nongïalam.
Kum ban shu kdew hangne, ka jingïakhih sangeh treikam ba khlem buh por ka ban sdang naduh ka 13 tarik mynta u bnai kan ïaid beit shakhmat.
