Shillong, Naiwieng 13
Ka United Democratic Party (UDP) ha ka Lah Sngi U Blei ka la thaw ïa ka State Election Com-mittee (SEC) na ka bynta ban jied ïa u kyrtong MP bad kumjuh ki kyrtong ban ïakhun ïa ka ilekshon MDC ba la buh ban long ha u snem ban wan.
Haba kren sha ki lad pathai khubor hadien ba la wai ka jingïalang jong ka Central Executive Committee (CEC), u President ka UDP u Bah Metbah Lyngdoh u la ong, “Ka jingïalang ka CEC ka la ai jingmynjur ban thung ïa ki dkhot ka SEC bad ba kane ka committee kan long beit na ka bynta ka ilekshon MP bad MDC bad ha kaba ngi la aiti ha ka SEC ba kan peit ha kaba ïadei bad ka kam ki kyrtong kiba la pynpaw ka jingkwah ka jong ki ban ïakhun na ka UDP”.
U Bah Metbah u la pyntip ruh ba ka CEC ka la rai ban kyrshan ïa ka rai kaba la shim da ki nongïalam ka UDP bad Hill State People’s Democratic Party (HSPDP) ha ka jingïalang kaba la long ha ka 7 tarik mynta u bnai ban ïatreilang ryngkat ha ka ilekshon MP na Shillong Parliamentary Constituency.
Ha kaba ïadei pat bad ka Tura Parliamentary Constituency, u Bah Metbah u la ong ba ka jingïalang ka CEC ka la aiti sha ka SEC ryngkat bad ki katto katne ki nongïalam na rilum Garo ban shim rai halor u kyrtong.
Shuh shuh na ka liang une u nongïalam ka UDP u la ong, ba ka jingïalang ka CEC ka la bthah ruh ïa baroh ki distrik bad jylli jong ka seng ba kin bteng ban trei shitom na ka bynta ka seng bad kumno ban nang pynkhlaiñ shuh shuh ban pynkhreh na ka bynta ka ilekshon MP bad MDC.
U Bah Metbah u la ong ba ha kaba ïadei bad ka kam kyrtong na ka bynta ka Shillong Parliamentary Constituency, la ieh ha ka SEC bad ryngkat ka jingïakren bad ki nongïalam yn sa shim ïa ka rai ryngkat bad ka HSPDP hapoh ka lama jong ka Regional Democratic Alliance (RDA).
Katkum ba ka paw na ki tyllong khubor, ki la don haduh 3 ngut kiba la pan tiket na ka UDP ban ïakhun ïa ka ilekshon MP na Shillong. Kine ki long u MLA barim ka Mawlai Bah Process T Sawkmie, u Dr DRL Nonglait, President ka KAS bad u President barim ka HYC u Bah Robertjune Kharjahrin uba la pynïasoh sha ka seng UDP.
Haba kylli, u Bah Metbah u la ong ba ka SEC kan sa shong jingïalang kloi katba lah na ka bynta ban pynbna ïa ka kyrteng u kyrtong ban ïakhun ha ka ilekshon MP.
