Shillong, Naiwieng 13
Kawei ka longkmie ka la duh noh ïa ka jingim hadien ba shah tynrah ha kawei ka thuk-thuk kaba la jia ha ka janmiet jong ka Lah Sngi U Blei ka 13 tarik mynta u bnai.
Kane ka longkmie kaba la khlad noh ka dei kaba la tip kyrteng kum ka Kong Lari Iawrod kaba shong ba sah ha Kynton Massar, Block-A bad ka shnong trai ka dei na Phlangwanbroi.
Katkum ka khubor ba la ïoh, kane ka jingjia ka la jia ha Lad Pata ha Mawlai Mawdatbaki ha ka por katba kane ka longkmie ka dang thmu ban jam sha shiliang jong ka surok, hynrei kyndit-kynsan ka thuk-thuk kaba don ïa u registration number ML05-AA-6505 ka la tynrah beit haduh ba kane ka longkmie ka la kyllon khram ha madan ha ryngkat ka jinglyngkien jong ka snam.
Ha ka jingsakhi jong ki nongleit nongwan, la ong ba katei ka longkmie ka la mynsaw jur na ki bynta jong ka khlieh bad ka khlem tip briew shuh. Kumta hadien ba la pynkit noh sha ka jaka ai jingsumar, kane ka longkmie ka la khlad noh namar ka jingjur jong ka jingmynsaw.
